1. Гурван залаа, бүчтэй, тарнийн үсэг дармалласан бяцхан туг: хийморийн дарцаг (хийморийн туг) - Хэзээ ч юм, оройдоо хийморийн дарцаг, хадаг яндар хийсгэсэн том овоотой, жил бүрий тахидаг догшин лус савдагтай ойр хавьд цуутай байснаа өвгөн хайрхан одоо бүүр түүр санах шиг болно. Д. Гармаа. Аниргүй хайрханы шивнээ., дарцгийн хэл (дарцгийн залаа) - Хоёр хоногийн дараа Ац голын зүүн дэх зулзаган модтой нарлаг дулаан энгэрт хээрийн салхинаа дэрвэх маанийн цагаан дарцаг доор Данзангийн цогцос мөнхөрч билээ. Б.Нямаа. Арандалынхан;

---

2. Иш бүхий жижиг далбаа: дарцаг барих (жижиг далбаа гартаа авах), дарцаг хийсгэх (дарцгийг салхинд дэрвүүлэх), улаан дарцаг (улаан өнгийн дарцаг, хувьсгалын бэлгэ тэмдэг) - Хадан хясааны аман дээр иртэл улаан дарцаг хийсгэсэн хэдэн орос цэрэг угтлаа. С. Удвал. Их хувь заяа., цагаан дарцаг (хэлэлцээ хийх, бууж өгөхөд хэрэглэх дохио тэмдэг; ихэвчлэн цагаан өнгийн бөс даавуу, цагаан өнгийн зүйл хэрэглэдэг) - Тал дундуур аажим тэнүүн урагшилж явсан нүүдлийн цувааны өөдөөс цагаан дарцаг барьсан хоёр хүн угтан ирлээ. Л.Түдэв. Улаан долгион., туг дарцаг [хоршоо] (жижиг туг; сүр жавхаа, хийморийг бэлгэдэн салхинд хийсгэнэ) - Газрын цэцэг тэнгэрт ганхана уу гэлтэй, гал улаан туг дарцаг, далбаа намирна. Ж.Бадраа. Уяхан хорвоон хань.