Адуу, хулан, тахь, илжигний гурваас дээш настай эмэгчин - Халиун азаргын сүргээс баахан унагатай гүү тасран гарч эзэндээ давхин иржээ. Б.Бааст. Алтайн хөх дөнөн., боос гүү (хээл авсан гүү), сувай гүү (хээл аваагүй гүү), хусран гүү (даагаа хөхүүлдэг гүү), гүү барих (зуны эхэн сард айраг хийхээр унага уяж, гүүгээ саах), гүү саах (а. Гүүг ивэлгэн сааж сүүг авах; б. Чулуу, шагай зэргийн юм сөөлжүүлэн дээш шидэж алдалгүй барьж авах наадам), гүү тавих (хүйт орох үеэр гүү саахаа больж, унагыг нь сул тавих), гүү унагалах (гүү унагаа гаргах), гүүний айраг (гүүний саамаар исгэсэн ундаа), гүүний зэл (унага уяж, гүү саах зэл), гүүний саам (гүүнээс саяхан саасан сүү), гүүний цацал (гүү барьсан өдөр сүүнээс цацаж өргөх ёслол), гүүний сацлын судар (гүүний сацал хийх үест унших судар), гүүний үрс гаргах (зун цагт гүү эхэлж барих үеэр зэлнээс зайдуухан овоо босгож, арц хүж уугиулан, цагаан эсгий дэвсэж, үрсийн ерөөл айлддаг зан үйл), гүүтэй хүнээс хүүтэй хүн [зүйр цэцэн үг] (мал хөрөнгө хэдий их хурааж цуглуулавч, үе удам залгах үр хүүхэдгүй бол тусгүй гэсэн санаа), гүүн хөх [ургамал] (нохойн хуухтай адил зэллэн ургана, жижигхэн гуагийн адил болоод хоёр үзүүрт шуумгай үүтэй ногоо).