1. Хэвэгч амьтны идсэн хоолыг агуулдаг сав - Сэвс гүзээ харсан хэрээ, шаазгай шиг шулганаж байлаа. Ч.Лхамсүрэн. Мамий Жукей хоёр., гүзээ зумлах (буцалмал халуун усаар гүзээний үс зумлах), гүзээ дүүргэх (их идэх), гүзээ суух (махлан таргалах) - Сампил нэлээн махалж, бүр гүзээ суух шинж орчихож гээч. Д. Сумьяа. Мэргэ., гүзээ тээрэх (гэдсэнд хий дүүрэх), борцолсон гүзээ (хатаасан гүзээ), гэдэс гүзээ [хоршоо] (зургаан сав /цөс, ходоод, олгой, нарийн гэдэс, давсаг, самшуу/-ын ерөнхий нэр) - Саахалтых нь гадаа, уявал уралдаж магадгүй гэсэн зээрд морь нуруугаа авахуулчихсан, гэдэс гүзээ нь тасам болоод зогсож харагдлаа. С. Дашдооров. Говийн өндөр., *усан гүзээ болох (а. Унд их уудаг болох; б. [шилжсэн] Шалба норох, нэвт норох);

---

2. Гүзээнд хийсэн юм: гүзээ сүү (гүзээнд хийсэн сүү), гүзээ тос (гүзээнд хийсэн тос) - Харин Содномын эх ирж замын хүнс болгож хоёр гүзээ цагаан тос, том гэгчийн ширэн савтай борц өгснийг авлаа. Ч.Лодойдамба. Тунгалаг Тамир., *гүзээ шороодох (үхэх), *гүзээнд наалдсан дэлүү шиг (огт салахгүй дагах), гүзээтэйгээ гүвж, сангарцагтайгаа савах (а. Бага сага нөөц, хадгалсан бүхнээ сүйтгэх, хөрөнгөө хөнтрөх; б. Дотроо бодож байсан үгээ бүгдийг тоочин хэлэх гэсэн санаа).