1. Гадаа, юмны дотор биш: гадна байх (гадаа байх), гадна ирэх (гадаа ирэх), гэрийн гадна (гэрийн дотор биш гадаа) - Ингэж ярьсаар явтал хайнаг тэрэг гэрийнхээ гадна ирж зогсов. Ч.Лодойдамба. Тунгалаг Тамир.,

---

2. Гадаад байдал: гадна үзэсгэлэнтэй (гадаад байдал нь гоо сайхан үзэсгэлэнтэй), гаднаас нь харах (гадаад байдлыг нь харах) - Гаднаас нь харахад дуу цөөнтэй овоо хүн шиг байсан юм. П.Хорлоо. Багш., гадна тал нь тоть тогос, дотор тал нь шалбааг намаг [зүйр цэцэн үг] (өнгөн дээрээ сайн сайхан мэт боловч үнэн хэрэгтээ муу буруу сэтгэлтэй), гаднаа гяланцаг, дотроо паланцаг [зүйр цэцэн үг] (дотоод сэтгэл нь өмссөн хувцас шигээ сайхан биш гэсэн санаа), могойн эрээн гаднаа, хүний эрээн дотроо [зүйр цэцэн үг] (хүний сайн муу сэтгэл дотор байдаг тул таньж мэдэхэд хэцүү гэсэн санаа);

---

3. Зорьсон, тухайлснаас ангид - Хөрөнгөөрөө нэгдэхээс гадна хөдөлмөрөөрөө нэгдэх ёс бий. Ч.Ойдов. Их жанжин Сүхбаатар танаа., үүнээс гадна (үүнээс ангид), түүнээс гадна (түүнээс ангид);

---

4. Дэргэд, ойр, хажууд: гадна байх (ойр байх), гадна ирэх (гэрийн гадаа ирэх);

---

5. Гадаад, өөр, харь: гадны бараа (гадаадын бараа), гаднын зочин (гадаадын гийчин), гадны хүн (а. Гадаадын хүн, харь хүн; б. Тус байгууллагад ажилладаггүй хүн; хөндлөнгийн хүн), гадна дотно [хоршоо] (хүний өөрийн; гадаа дотор) - Ор дэр, сандал тэргүүтэн гадна дотнын хэрэглэл цөм бүрэн байна. ААЗ.