1. Уян зөөлөн эдээр хийсэн цул буюу дотроо хий бүхий бөмбөлөг зүйл: гар бөмбөг (а. Татсан тор дээгүүр бөмбөг давуулан шидэж, газарт унагахгүйг хичээн, зургаа зургаагаараа талцан наадах тоглоом; волейбол; б. Гараар шидэх тэсрэх зүйл, гранат), одон бөмбөг (а. Ширээн дээр намхан татсан торон дээгүүр жижиг бөмбөгийг цохиураар нөгөө тал руугаа давуулан цохиж талцан тоглох спорт тоглоом; б. Энэхүү тоглоомд хэрэглэх жижиг бөөрөнхий бөмбөг), сагсан бөмбөг (сагс мэт дүүжилсэн торонд бөмбөг шидэж оруулан талцан тоглох спортын нэг төрөл), хөл бөмбөг (хоёр баг болж, эсрэг талын торон хаалганаа бөмбөг өшиглөн хөөж оруулан тоглох спортын нэг төрөл) - Жинчний гудамжид хөл бөмбөг өшиглөсөөр байгаад тэр хавийн хүүхдүүдийг сайн таньдаг болов. С.Эрдэнэ. Хонгорзул;

---

2. Сураар сүлжиж хийсэн, дотроо хөндий, бөөрөнхий, морин дээрээс харваж наадах тоглоом: бөмбөг намнах (модны хооронд татсан хэцнээс үхрийн үлээсэн давсаг буюу хурганы гүзээ унжуулан уяад түүнээс том хүн тавин хоёр, хүүхэд гучин зургаа нумын зайд морины хурдаар давхиут дөрөв дөрвөн сумаар харваж онодог), бөмбөг харвах (бөмбөг намнах) - Гучин нумын газар гурван бөмбөг байгуулж морьт хуяг морь ташуурдан довтолгон гурван гурав оносныг тэргүүн болгоно. С.Удвал. Их хувь заяа;

---

3. Сураар сүлжиж хийсэн дотроо хөндий том бөөрөнхий, морь, тэмээн дээрээс урт модоор цохиж наадах тоглоом: бөмбөг дэлдэх (морь, тэмээн дээрээс урт модоор бөмбөг цохиж тоглох наадам; поло);

---

4. Тэсрэх бодис агуулсан дэлбэрэх зүйл: атомын бөмбөг (бодисын хамгийн бага хэсгийг агуулсан сүйрэл ихтэй дэлбэрэх цөмийн зэвсэг), устөрөгчийн бөмбөг (амт үнэргүй маш хөнгөн бие махбод бүхий аюултай тэсрэх бодис), бөмбөг дэлбэрэх (тэсрэх бодис дэлбэрэх) - Хуарангийн зүгээс буудах хараал тавих, гаслах, ёолох, уйлах, бөмбөг дэлбэрэх дуун зогсоо зайгүй сонстож эхлэв. Л.Түдэв. Улаан долгион.