1. Ойрын юмыг заан нэрлэх үг: энэ хүн (нүүр тулан уулзаж байгаа хүн) - Энэ хүн цэцэрлэгч өвгөн юм уу даа? гэж хурандаагийн сэтгэлд бодогдож байв. Д.Дожоодорж. Зүүний сүвэгч., энэ зуур (ойр хавиар) - Энэ зуур ... ямар ч сураг чимээ байсангүй. С.Лочин. Сэтгэлийн өнгө., энэ мэт (үүнтэй адилхан) - Ер нь энэ мэтээр өгүүлээд байвал ... өчнөөн зүйл өгүүлж болно. Б.Бааст. Алтайн хөх дөнөн., энэ тушаа (үүний харалдаа, энэ хавьд), энэ хавьд (ойр орчимд) - Баян Михайлов, энэ хавьд нээрээ ч таныг амьтан хүн андахгүй юм. Б.Ринчен. Сандо амбан., энэ мэтчилэн (энэ мэтээр, үүнтэй адил), энэ тэр [хоршоо] (а. Ойр болон хол байгаа юм; б. Олон юм; в. Гэх мэт) - Сургуулийн захиргаанаас явуулсан бичиг илгээлт энэ тэрийг үзэж элдэв юм асууж танилцав. Б.Сосорбарам. Очсын хүрээлэн., энэ тэр болох (элдвийн олон юм болох), энэ төрөлдөө горьгүй, эргэж төрвөл магадгүй  (хэзээд дийлэхгүй, чадахгүй гэсэн санаа), энэ биеийнхээ залууд сур, ээж аавыгаа амьдад нь асар [зүйр цэцэн үг] (а. Эрдэм номыг залуудаа сур, эс бөгөөс хожим харамсана; б. Ээж аавыгаа амьдад нь асар, эс бөгөөс хожим харамсана гэсэн санаа), энэ бие өсөөд ээжээ хялайх муухай, эрдэм ном сураад багшаа муулах муухай [зүйр цэцэн үг] (хүний ачийг мартах муухай гэсэн санаа).