Хэвлэх


2022-01-28 07:14:32http://mongoltoli.mn/

ШУВУУ

Өд өрвөлөг жигүүртэй, өндөглөж үрждэг, бүлээн цуст, сээр нуруут амьтан, төрөл зүйл маш олон: шувуу буцах (намар болж усны шувууд дулаан орон руугаа эгэн явах), шувуу нисэх (шувуу агаарт хөөрөн одох) - Шувуу нисэж, сүүдэр нь тусаж байв. ”Утга зохиол урлаг” сонин., шувуу судлаач (шувуу судлалд мэргэжсэн хүн), шувуу судлал (амьтны аймгийн судлалын дотроос тусгайлан шувууны аймгийг ялган судлах ухаан), шувуу тэжээх (шувууг гаршуулан тэжээж үржүүлэх), шувууны аж ахуй (гэрийн шувууг үржүүлэх, өсгөх аж ахуйн салбар), шувууны мөр (шувууны хөлийн ором) - Сэг дээр ирсэн хүний мөр, нохой шувууны мөрийг шинжинэ. Б.Бааст. Алтайн хөх дөнөн., шувууны таарцаг (шувуу хийж агуулах сав), шувууны үүр (шувууны, өндөг, ангаахайдаа зассан оромж), шувууны чуулган (намар цагт, шувууд олноороо нэг дор цугларах нь), гэрийн шувуу (гэршүүлсэн шувуу), жигүүртэн шувуу (жигүүр бүхий амьтад) - Хүнд байтугай жигүүртэн шувуунд ч үл үзэгдэх тийм бэрх нууц газар шивээлэн байв. Ж.Дамдин. Миний монгол., зэрлэг шувуу (тэжээвэр биш, хээрийн шувуу), лам шувуу (ангир), махчин шувуу (махаар хооллодог шувуу) - Үхсэн малын сэг дээгүүр махчин шувууд эргэлдэж байв. С.Удвал. Та бид уулзана., нуурын шувуу (нуурт амьдардаг шувуу), нүүдлийн шувуу (дулаан оронд өвөлжөөд, төрсөн нутагтаа ирж өндөглөдөг шувуу) - Ховд голын ус татран, нүүдлийн шувууд нутгийн минь тэнгэрээр зэл татан өмнө зүгийггг чиглэв. “Утга зохиол урлаг” сонин., тэжээмэл шувуу (гаршуулсан, гэрийн шувуу), усны шувуу (усанд амьдардаг шувуу) - Гэхдээ усны шувуу нууртаа, зэрлэг араатан ой тайгадаа жаргалтай байдаг. П.Лувсанцэрэн. Хөдөөгийн дуун., цаасан шувуу (цаасаар шувуу мэт дүрс хийж утсаар уяад салхинд нисгэн наадах тоглоом) - Жижигхэн бор хүү цаасан шувуугаа бариад, тавиад орхитол дээр хөөрөв. М.Чимид. Алтан номын үсэг., ав шувуу [хоршоо] (шувуугаар агнах ан), нохой шувуу [хоршоо] (амьтан) - Бензин тосны үнэрт барагтай бол нохой шувуу ойртохгүй. Б.Бааст. Алтайн хөх дөнөн., ангир шувуу [амьтан] (голдуу гал шар өнгөтэй, усанд умбах хөвөхдөө чадамгай, задгай ус бүхий газар, цаг агаар сэлгэн нутаглах шувуу; лам шувуу) - Хосоор нисэх ангир шувуу ганганан дуугарч, голын тохойд эргэлдэн байлаа. Ж.Пүрэв. Гурван зангилаа., бор шувуу [амьтан] (нүд улаавтархан, хошуу болоод толгой, сүүл харавтар, цагаан чандартай, нэг зүйл болжмор) - Бөөн бор шувуу нисэх мэт гэнэтхэн дэрхийн үргэж нисэв. Б.Бааст. Хяруу унасан цагаар., жив шувуу [амьтан] (бэгбаатар, бүгээхэй), шар шувуу [амьтан] (жигүүр болоод хошуу богино, өдөн чихтэй, өд нь нягт бөгөөд хөндлөн харавтар судалтай, шөнө явдаг, махчин шувуу) - Ойрхон шар шувуу зэвүүн муухай орилж байлаа. Н.Банзрагч. Зам., шувуун зангуу [ургамал] (нэг зүйл зангуу), шувуун нударга [ургамал] (ууланд ургах, үндсээр нь гурил хийж иддэг, нэг зүйл навчирхаг ногоо), шувуун онгоц (хамар шуумгай, хойд тал нь тэгш хэлбэртэй усны онгоц), шувуун таваг [ургамал] (навч цайвар ногоон, жижиг цагаан цэцэгтэй, ногоон байхад нь бог мал сайн иддэг, говь газарт хоёроос таван сантиметр өндөр ургадаг ургамал, заан таваг), шувуун фабрик (гургуул, тахиа зэрэг шувуу өсгөж үржүүлдэг үйлдвэр), шувуун хошуут [зурхай] (хумхын ордонд байрлах одны нэр), шувуун хөл [ургамал] (баг цэцгийн хэлбэр байдал нь шувууны хөлтэй адил төстэй нэг зүйл сонгинолог ургамал).

--oOo--