1. Шороог шигшин нарийн ширхэгтэй болгон шатаан боловсруулж хийсэн хатуу бөгөөд хэврэг, ваарнаас нарийн эд: шаазан ваар (шаазангаар хийсэн ваар) - Ширээн дээр шаазан ваар тавьжээ. Б.Ринчен. Гүнж., шаазан сав (шаазангаар хийсэн сав), шаазан таваг (шаазангаар хийсэн таваг) - Цонхон дээр нь байдаг алтан луутай шаазан таваг ойчвол амархан хагарах байлаа. С.Эрдэнэ. Хонгор зул., шаазан хүн (хүний дүрс гарган хийсэн шаазан), шаазан тоосго (шаазангийн шороогоор хийсэн барилгын материал), шаазан эдлэл (каолин, галд тэсвэртэй уян шавар, цахиур, хээрийн жонш зэрэг эрдэс түүхий эдийг хольж өндөр температурт шатааж пааландсан вааран эдлэл), шаазангийн үйлдвэр (шаазан эдлэл хийдэг үйлдвэр), шаазангийн шавар ~ шаазангийн шороо (шаазан хийдэг маш нарийн, цагаан, гуулин шороо), шаазангийн шир (давирхай, будаг зэргээр хийдэг гоёлын нэг зүйл), бүдүүн шаазан (муухан боловсруулсан шаазан) - Эрдэнэ хагарахдаа бут үсрэн жижигхэн хэсэг болдог учраас эвлүүлэх үлэмж хэцүү. Харин бүдүүн шавар шаазан бол болдог юм шүү. Ч.Лодойдамба. Тунгалаг Тамир., нарийн шаазан (сайн боловсруулсан шаазан);

---

2. Шаазангаар хийсэн аяганы ерөнхий нэр: шаазан аяга (шаазангаар хийсэн аяга), шаазанд уух (шаазан аяганд уух) - Далан хүн дамжилдаг далгай шар шаазангаар дараагаар гурав ууж мордоод гарав. Жангар., шаазанд хийх (шаазан аяганд юм хийх), гангар шаазан (а. Маш нарийн хийц бүхий нимгэн шаазан; б. Түүгээр хийсэн аяга) - Гангар шаазан гаран дээр байна, ганцхан сэтгэл түүн дээр байна. Монгол ардын дуу., - Эмгэн үглэсээр гангар шаазан дүүрэн хар ногоон арз аягалж өглөө. Л.Түдэв. Нүүдэл., аяга шаазан [хоршоо] (аяганы ерөнхий нэр).