Чөтгөр, сахиулсан, араатан гөрөөсний толгойн дүртэй баг өмсөж бүжиглэх шашны ёсны бүжиг: цам үзэх (цам бүжиг сонирхох), цам харайх (а. Цамын элдэв бэлгэ тэмдэг бүхий баг өмсөн бүжиглэх; б. Тогоруу бүжиглэх - “Тоодог муухай, Тогоруу хөөрхөн, Цам харай” гэхэд тогоруунууд тонголзож, гэдэлзэж, тойрч дайрч харайлаа. Д.Пүрэвдорж. Бөмбөл эрдэнэ), цам цамнах (цам бүжиглэх), цамын баг (цам харайхад өмсөх баг), цам майдар [хоршоо] (бурхны шашны ёсны бүжиг наадам) - Орхимжийн тасархай хэдэрч, цам майдар, хурал хуйд хааяа өмсөн явна. Б.Ринчен. Үүрийн туяа., бүжиг цам [хоршоо] (шашны багт бүжиг наадам).