1. [ургамал] Цэцэг нь шаравтар, тоор мэт хар хүрэн жимстэй, унгарил нь цагаан нэг наст сөөг ургамал: хөвөнгийн хонгорцог ~ хөвөнгийн тоор (хөвөнгийн жимс), хөвөнгийн тос (хөвөнгийн үрээс шахаж авсан тос), хөвөн тарьсан хүн хүйтнээс айхгүй, хүүхэд заяасан хүн хожмоос айхгүй [зүйр цэцэн үг] (а. Үр хүүхэдтэй хүн өтлөхдөө жаргах; б. Бэлтгэл сайтай ажил үйл бүтэхдээ хялбар гэсэн санаа), хөвөн өвс [ургамал] (улалжтан овгийн намаг газар ургадаг олон наст өвс, үрлэх үедээ хөвөн мэт үстэй болно; хөвөн түрүүт), хөвөн оройт [ургамал] (цайны оронд хэрэглэж болдог орой дээрээ хөвөн мэт том цагаан цэцэгтэй ургамал. Түүж аваад шүүсийг нь сарниулалгүй өөрт нь шингээн хатаасны дараа жижиглэн хэрчиж уутанд хийж нар дагуулан хатаах бөгөөд тийнхүү хатааж байхдаа усаар гадна талаас нь байн байн шүршинэ. Үүний дараа үнэртэн үзэхэд өнгө нь бага зэрэг харлаж цайны адил болно. Түүнийг хавтгай төмөр буюу цар тогоонд хийж хууран жинхэнэ цайны амт оруулан битүү саванд хийж хадгалан хэрэглэнэ), хөвөнгийн улаан аалз [амьтан] (өнгө улаан, үржих нь түргэн таримал ургамлыг хөнөөдөг нэг зүйл жижиг аалз), хөвөн түрүүт [ургамал] (хөвөн өвс);

---

2. Мөн ургамлын унгарил: хөвөн тавих (хөвөн зулах), хөвөн зулах (хөвөнг нимгэн нимгэнээр тарааж тавих), хөвөнгийн үйлдвэр (хөвөн боловсруулах үйлдвэр), хөвөнгийн тариалан (хөвөн өвсний тариалан) - Шаргын говьд ч хөвөнгийн тариалан байх биз. Л.Түдэв. Нүүдэл., хөвөнтэй дээл (хөвөн зулж оёсон дээл), хөвөнтэй хөнжил (хөвөн зулж оёсон хөнжил), ариутгасан хөвөн (тусгай орчинд ариутган битүүмжилсэн хөвөн), түүхий хөвөн (боловсруулаагүй хөвөн), *хөвөнгөөр хад цохих (хүчээр харьцуулшгүй этгээдтэй өрсөлдөх), *хөвөнд ороосон чулуугаар түнших (битүү үгээр давах, битүү егөөдөж янз байдлыг нь турших) - Занги, өвгөний тэр үг сонсоод хөвөнд ороосон чулуугаар цохисныг мэдээ ч үгүй болж өгүүлэв. Б.Ринчен. Үүрийн туяа;

---

3. Хөвөнгөөр хийсэн юм: хөвөн бараа (хөвөн даавуу), хөвөн даавуу (хөвөн оролцуулж хийсэн зөөлөн даавуу) - Гэдэснээс нь хөвөн даавуу цувж, нэгэн сонин юм үзүүлэв. Дожоодорж. Зүүний сүвэгч;

---

4. Хөвөн шиг байдалтай: хөвөн цагаан үүл (хөвөн шиг сэвсгэр цагаан үүл) - Хөхөө өвлийн хүйтэнд хөвөн цагаан өнгөтэй, хөх цэнхэр будантай. Халх ардын тууль.