1. Үзүүлэх - Би нутгаараа дайрч гэр орныхондоо бараагаа харуулаад баруун тийш явна. С.Удвал. Их хувь заяа., магадалгаа харуулах (магадалгаагаа үзүүлэх), хүчээ харуулах (хүчээ үзүүлэх, хүчтэйгээ мэдүүлэх), шилээ харуулах (а. Хүзүүний ар хэсгийг харуулах; б. [шилжсэн] Тээршээгдэж, түвэг болж байсан хүн өөрөө явах) - Одоо нүүрээ буруулах арай болоогүй байгаа болохоор саатуулахын тулд энэ амбан дээр би очъё. Сандо ноён ч бидэнд шилээ харуулах цаг холгүй болсон байх аа. Ж.Пүрэв. Аянга., *шилний хонхор харуулах (шилээ харуулах) - Та ч улаан нүүрээрээ учрахад уужим хорвоог ч болтугай урд чинь авчирч тавихад бэлэн гэчхээд, цааш эргэж шилний хонхор харуулмагц буугаа шийрлэж чадах юм гэж хэлсэн билээ. Б.Бааст. Хунгийн дууль., *нуруугаа харуулах (явах, гарч явах);

---

2. Асруулах, маллуулах: хүүхэд харуулах (хүүхдээ түр асруулах), малаа харуулах (малаа түр маллуулах) - Миний л толгой дээр хамаг юм бууна. Шарнуудаа мал цөөнтэй айлуудаар тарааж харуулдаг. Би хөлсийг нь өгөөд ирлээ. С.Эрдэнэ. Хулан Цамба хоёр;

---

3. Мануулах, сахиулах: гэрээ харуулах (гэрээ сахиулах);

---

4. Хандуулах, чиглүүлэх - Яарсандаа болоод өмдөө буруу харуулаад өмсчихсөн байжээ. Ж.Бямба. Их аяныхан., зөв тийш нь харуулах (зөв тийш нь хандуулах, чиглүүлэх), дээш нь харуулах (дээш хандуулах);

---

5. [шилжсэн] Алах: цааш харуулах (алах) - Дахиад Га ноёны хошуунд харш юм хийвэл дор нь цааш нь харуулна гэж мэдээрэй. С.Удвал. Их хувь заяа.