1. Үржих үйлийн нэр; өөртэйгөө адил төст биеийг төрүүлж удмаа залгамжлуулан үлдээж оршин тогтох амьд биесийн үзэгдэл - Хүн ардын үржил нь хөгжиж өссөн нь цөөнгүй. С.Буяннэмэх. Түүвэр зохиол., үржил мал (үржиж олшрох мал, үржүүлсэн мал ахуй) - Өөрөө эзэн хүний ёсоор сууж үржил малаар хотоо дүүргэж. Алтай хайлах., үржил сайтай (үржиж олшрохдоо хурдан) - Цэвэр нарийн ноолууртай үнэт бүгдийг агуулсан үржил сайтай ямааны чинь буян хишиг дэлгэртүгэй. Халх ардын тууль., үржлийн арга (мал, амьтныг үржүүлж хээлтүүлэх арга), агсан үржил (а. Агсан тавьж, хүүгээр арвитгасан мөнгө; б. Агсан авсны (зээл авсны) өр шир), бэлгийн үржил (эр, эм бэлгэ нийлж үр тогтох нь), малын үржил (малын үржиж олшрох нь), үржлийн цөөрөм (зуны улиралд үржлийн загас хадгалах цөөрөм), үржил хөгжил [хоршоо] (өсөлт дэвжил), өсөлт үржил [хоршоо] (өсөн нэмэгдэж, олшрох явдал), үржил хонжлого [хоршоо] (үржүүлж олон болгосноос гарах ашиг) - Хэтэрхий үржил хонжлогоор эд арвитгахыг хэзээд хүсэгчид үндсээр хохирох нь олон. Модны шастир;

---

2. Хөрс шороо, ургамлын шим тэжээл, шүүс: үржил сайтай хөрс (шим тэжээл сайтай хөрс), үржил шим [хоршоо] (шим тэжээл, шим шүүс) - Дорнын их талыг усжуулж чадвал хэчнээн үржил шимтэй болохыг хэлээд баршгүй. С.Эрдэнэ. Хонгор зул., үржил жимс [ургамал] (мод цэцэглэхгүй, жимс салаа найлзуураас ургадаг, анарын мэт том, өнгө харавтар улаан, амт хүчтэй, чанаж иддэг нэг зүйл жимс).