28-р онд (1903) мөнгө тусалсан учир гурван нүдний тогосын отго шагнан хадуулжээ. Мөн онд хязгаарыг сэргийлэх хэрэгт хүчин зүтгэсэн учир харавтар улаан жолоо шагнуулж, нэгэн жилийн пүнлүүний мөнгийг тусалсан учир долоо нэмсэнг гурав тэмдэглэсэн зэрэг нэмүүлжээ. 30-р онд (1905) дэд чуулганы даргаар тохоогдож, Хэвт ёсны тэргүүн онд, (1909) жинхэнэ чуулганы дарга болжээ. Богд гэгээнийг эрдэнийн сууринаа залсанд, Зарлигаар үе улиран ногоон жууз, шар хүрэм, улбар шар жолоо, Эрдэнэ бишрэлт цол хүртжээ.