Буддын шашинд нэвтэрсэн эрдэм чадалтай хүн тусгай уншлага тарнийн хүчээр бороонд норохгүй байхыг бороо хариулах гэдэг

Бороо хариулах зан үйлийн талаар миний бие Булган аймгийн Гурванбулаг суманд амьдарч байгаа Улаан хэмээх хочтой Энхбат гэдэг хүнээс багадаа сонсож байсан. Энэ хүнтэй манайх олон жил айл саахалт явсан юм. Энхбат гуай хүүхэд ахуй насандаа бороо хариулж яваа хүнийг өөрийн нүдээр харжээ. Бороо хариулах тарнийг морины шогшоонд уншдаг гэх бөгөөд хичнээн ч устай аадар орсон бай хамаагүй, хариулж буй хүнийг хааш хаашаа тохой хэрийн зайтайгаар бороон дуслууд тойрон унаж байсан гэдэг. Хэрвээ унаж яваа морь нь алхах юм уу хатирах зэргээр хурдаа өөрчлөхөд хариулагчийн бие дээр бороон дуслууд унаж эхэлдэг байна. Энхбат гуайн нотолж ярьснаар нэг их зүсэр бороотой зуны өдөр тэднийд бороо хариулагч буусан бөгөөд унаж яваа мориных нь толгой хондлойноос бусад газар нь хув хуурай байсан гэдэг. Орчин үед хүн итгэмээргүй, үлгэр домгийн гэмээр энэхүү зан үйлийг буддын шашинд нэвтэрсэн хүмүүс л хийдэг байсан гэх бөгөөд өчүүхэн төдий алдаа гаргахад тухайн орон нутагт нь ган юм уу үер нүүрлэдэг байсан учраас бороо хариулагчид тус ар