1. Мяндас, ноос, хөвөн зэргийг нарийн болгож, цувж нийтгэсэн нь: утас нийтгэх (ёнхор хөвөн зэргийг нийтгэн утас гарган авах), утас ороох (уран оёдлын нэг төрлөөр оёх) - Өнгө бүрийн торго хоргойгоор нааж утас ороож шаглаж солонгоруулан урлажээ. Ж.Дамдин. Үймээний жил., утас өлгөлцөх (утсаар хуруу ороож наадах нэг зүйл тоглоом), утас ээрэх (малын ноос ноолуурыг ээрүүл зэрэг хэрэгсэлд хийж утас гаргаж авах), утас зүү [хоршоо] (юм оёх хэрэгсэл), утас шөрмөс [хоршоо] (а. Оёж нэхэхэд зориулсан нийтгэсэн утас; б. [яриа] Телефон утас) - Зүү товч, утас шөрмөсөө хийж явахад надад хэрэгтэй байна гэжээ. Монгол ардын баатарлаг тууль., үйл утас [хоршоо] (юм оёх ажиллагаа); утас зүүгээ дагадаг, учир зүйгээ дагадаг [зүйр цэцэн үг] (ном журмаараа болох; жам ёсоороо болох гэсэн санаа), орооцолдсон утас мэт [зүйр цэцэн үг] (маш ээдрээтэй, үзүүр төгсгөл нь мэдэгдэхгүй гэсэн санаа) - Цэвээн тайж орооцолдсон утас адил элдэв бодолд дарагдан бодлогошрон сууж байлаа. Ч.Лувсанжав. Дамдины бага хүү., утсан хорхой [амьтан] (хавтгай хорхойн анги, их төлөв мах идэх сээрт амьтны гэдсэнд оршино, гэдэсгүй, идшийг хөвчин биед сорно, биедээ маш олон хэрчээстэй нэг зүйл хорхой), утсан замаг [ургамал] (цувраа олон эсээс тогтсон нарийн замаг);

---

2. Төмөрлөгийн зүйлийг нарийн цувсан нь; утсан холбоо (мэдээлэл агуулсан цахилгаан соронзон дохиог кабель шугам, агаарын шугамаар дамжуулж, хүлээн авдаг техникийн цогцолбор), утсан хөгжим (а. Утсаар дуугардаг хөгжим; б. Цахилгаан хөгжим), утсан хөрөө (мод болон зөөлөн төмрийг угалз гарган хөрөөддөг багаж); зэс утас (зэсээр цувж нийтгэсэн утас), төмөр утас (төмрийг нарийн цувж утас шиг болгосон нь), цахилгааны утас (цахилгаан дамжуулахад хэрэглэх гадуураа бүрээстэй зэс утас), чийдэнгийн утас (чийдэнгийн дотор байх нарийн нийтгэсэн төмөрлөг) - Чийдэнгийн болон радионы утас орсон зайгаар дамжин хүрнэ. “Цог” сэтгүүл;

---

3. Хөгжмийн чавхдас;

---

4. Шугам зураас гаргадаг нэгэн зүйл хэрэгсэл: утас татах (барилга зэрэгт тэгш хазгай болж буйг мэдэхээр утсаар хэмжээ тавих).