1. Ан амьтныг барих чангардаг гогцоо, оосор бүхий нэгэн зүйл агнуурын хэрэгсэл: урхи тавих (ямар нэг амьтан барихаар мөр дээр нь урхи зүүх), оготнын урхи (оготнын нүхэнд тавьсан занга), урхи тор [хоршоо] (ан барих зориулалттай хэрэгсэл) - Хон хэрээг урхи тороор биш уран аргаар амьдаар нь барьдаг. Б.Бааст. Алтайн хөх дөнөн;

---

2. Цалам: урхи цалам [хоршоо] (занга болон бугуйл) - Уяа дээсээ гартаа авч, урхи цалмаа урьтаж зэхэв. С.Дашдооров. Өнчин цагаан ботго;

---

3. [шилжсэн] Ов, мэх, муу арга: *урхинд оруулах (бусдыг өөрийн муу үйлд башир аргаар оруулах, мэхлэх), *урхинд орох (бусдын муу арга залинд унах, занганд орох, мэхлэгдэх) - Чи мөнгөн цөгц авчихсан юм уу? –Тиймээ алдчихсан юм гэв. Зайсан одоо л урхинд оров уу гэсэн шиг нэн шохоорхоно. Н.Наваан-Юндэн. Соёл-Эрдэнэ.