1. Хүн, амьтны биеийн тар тамир, хүч чадал, бяр - Цэрэндулам эмгэн намрын өглөө нар битүүд босоод үнээгээ сааж суухдаа тэнхээ жигтэйхэн алдарсныг мэдлээ. С.Эрдэнэ. Ээжийн авдар., тэнхээ алдрах (бие суларч, сулдайх, хүч тамир нь барагдах), тэнхээ барах (хүч тамир, чадал тэнхээ зарцуулж ихэд зүдрэх), тэнхээ барагдах (хүч тамиргүй болох), тэнхээ доройтох (а. Хүч тамир доройтох; б. Эрүүл мэндийн байдал муудах; в. Чадал тэнхээгүй болох), тэнхээ засрах (бие сайжирч хүч тамир орох), тэнхээ муудах (бие суларч, улмаар доройтож эхлэх), тэнхээ орох (а. Хүч тамир нэмэгдэх; б. Чадал чадвар ба хөрөнгийн хэмжээ дээшлэх), тэнхээ тасрах (а. Хүч чадал муудаж, хөдлөх аргагүй болох; б. Тэнхээ алдрах), тэнхээгээ үзэх (хүч чадлаа сорих, шалгах), тэнхээгээ үзэлцэх (хүч чадлаа харилцан үзэх, сорих), тэнхээ муутай (а. Биеийн хүч чадал дорой; б. Хэр чадал бага буюу барагтай), сэтгэлийн тэнхээ (хатуужил, тэсвэр), оюуны тэнхээ (оюуны чадал, оюуны багтаамж), ааг тэнхээ [хоршоо] (хүн амьтны ид чадал, хүч тамир, омог), бие тэнхээ [хоршоо] (хүний бие махбод болон хүч тамир), бяд тэнхээ [хоршоо] (хүний хүч тамир), бяр тэнхээ [хоршоо] (хүн, амьтны хүч чадал, тар тамир), тэнхээ чадал [хоршоо] (хүч чадал, тамир) - Тэнгэрийн цагаан буурын тэнхээ чадал нь барагдаад байв гэнэ. Торгууд захчин ардын үлгэр тууль., тэнхээ тамир [хоршоо] (биеийн бяр чадал, хүч тэнхээ) - Хэдэн жилийн дотор тэнхээ тамир алдраад байх юу болсон билээ дээ. А.Дашням. Хүрэндэлтийн хүүхэн., тэнхээ сүлд [хоршоо] (хүч тамир болон сүлд хийморь) - Тэнхээ сүлд доройтон хазайсандаа хулгай дээрэм самуурвай. Гурван улсын үлгэр., *тэнхээ мэдэн (чадлын хирээр, байдаг чадлаараа) - “Богдын өндөр ууланд борооны манан татна, буцаад хойшоо харахад Богдын хүрээ илхэн” гэж сүрхий бүдүүн хоолойгоор тэнхээ мэдэн дуулж гарав. Д.Намдаг. Цаг төрийн үймээн;

---

2. [шилжсэн] Бэл хөрөнгөний хэр хэмжээ: санаа байгаад тэнхээ хүрэхгүй (санаа байвч бэл хүрэхгүй), тэнхээгээрээ амьдрах (бэл хөрөнгөнийхөө хэмжээгээр амьдрах).