1. Саарал өнгөтэй, маш хүнд зөөлөн төмөрлөг: тугалга хайлах (тугалгыг өндөр температурт урсгах), тугалга зайлах (тугалга гүйлгэх), тугалга цутгах (хүйтэнд усанд хайлсан тугалга асгах нэг төрлийн дом), хар тугалга (хорголж), цагаан тугалга (цайвар өнгөтэй, зөөлөн төмөрлөг бөгөөд хувилахуй ухааны нэг зүйл махбод), тугалганы гялтгана (тугалганы гялга), тугалганы зос (тугалганы хонд), тугалганы хэт исэл (тугалганы шорвог исэл, тугалга дэндүү исэх, гашлах), тугалганы давс (гашуун давс), зэс тугалга ~ тугалга зэс [хоршоо] (хоёр төрлийн төмөрлөг) - Гагц Жүн юанийн газрын хэмжээлэн тогтоосон худалдааг бариваас зохих гааль алба ба архи дарс, давс хужрын гааль ба жич төмөр гууль, алт мөнгө, тугалга зэс, тариа түлшнээс гарах зүйлийг гаалийг нэгэн жилд сан орох нь тавин түмэн лан мөнгө, торго найман түмэн багц, тутарга дөчин түмэн дан илүү буй. В.Инжаннаши. Хөх судар., *хайлсан тугалга шиг (маш эелдэг зөөлөн зантай, сайхан ааштай);

---

2. Тугалгаар хийсэн зүйл - Тугалган барын дармал бичиг байх нь соньхон харагдав. С.Дашдэндэв. Улаан наран., тугалган гагнуур (хар тугалгыг цагаан тугалгатай хольж гагнах монгол дархны арга), тугалган жад (тугалгаар хийсэн жад) - Туйлбаргүй хүн буцахдаа амархан, тугалган жад шантрахдаа амархан. ААЗ., тугалган цаас (а. Цаас мэт нимгэлсэн тугалга; б. Тугалга мэт өнгөтэй нэг зүйл цаас), тугалган үсэг (хорголжин барын үсэг), тугалган хэвлэл (хорголжин үсгээр бар өрж хэвлэдэг хэвлэлийн арга).