1. Аливаа үйл явдлын мөн бурууг тогтооход энэ тийм болов уу гэж төсөөлөн тааварлах, хардах, сэжиг төрөх - Өвгөн Товуудай элдэв их л гайхаж сэжиглэх боловч эдгээр цуурхлыг мөн төдий үл үнэмшжээ. С.Буяннэмэх. Түүвэр зохиол., сэжиглэсэн харц (битүүгээр хардсан харц), битүүгээр сэжиглэх (ямар нэг юмнаас ажиг авч сэтгэл дотроо битүү хардах), хардан сэжиглэх (хар төрөн таамаглах) - Харин хардан сэжиглэх өөдгүй муу санаа огтхон ч төрсөнгүй билээ. Л.Содов. Хаврын нар., сэжиглэх тааварлах [хоршоо] (сэжиг төрж барагцаалан бодох), сэжиглэсэн юм сэрвэлздэг айсан юм арвалздаг [зүйр цэцэн үг] (хэтэрхий айх, сэжиглэх);

---

2. Бузар муухай юмнаас жигшиж дургүй хүрэх: цээрлэх сэжиглэх [хоршоо] (ямар нэгэн юмнаас ихэд цэрвэх), сэжиглэх сэрэмжлэх [хоршоо] (аливаа юмыг сэжиглэж түүнээсээ сэрэмжлэх) - Хамуунаас нь сэжиглэх болов уу гэж тэмээгээ өвдгөөс нь уяж орхиод модоо барьж чулуу аван айл өөд ойртов. С.Удвал. Их хувь заяа.