1. Шарх аньж эдгэрсний дараа арьсан дээр үлдсэн ором, мөр: өнгөн сорви (хөнгөн шархнаас үлдсэн ул мөр), гүн сорви (хүнд шархны ором), сорви арилах (шархны ор мөр үгүй болох) - Олдсон шарх сорви түргэн ариллаа. Б.Бааст. Алтайн цэцэг., сорви аних (шархны ул мөр бүдгэрэх), сорви тогтох (шарх анихдаа арьсан дээр ором үлдээх) - Хоёр хацарт нь уран хүний сийлсэн хээ угалз мэт хачин хэлбэртэй сорви тогтжээ. Б.Нямаа. Арандалынхан., сорви үлдэх (сорви тогтох) - Эр зориг, алдар гавьяаны тэмдэг болж зүүн хөлийнх нь хонгонд дугуй хүрэн сорви үлджээ. Б.Нямаа. Арандалынхан., сорви эдгэх (сорви арилах) - Хэдхэн хоногийн дараа залхуу Насангийн шарх сорви эдгэж царай зүс ороод явчихжээ. В.Шарма. Таван сургамж., шарх сорви [хоршоо] (хүн, амьтны ялтарсан арьсанд тогтсон ор мөр) - Хийдэд суудаг банди нарын зодуулсан шарх сорви Магсаржавын нүдэнд үзэгдэх шиг болов. С.Удвал. Их хувь заяа;

---

2. [шилжсэн] Нүдний муушаал - Миний муу хоёр сорви юу ч харахаа больж байх шив. И.Дамбажав. Монгол үгийн дээж;

---

3. [шилжсэн] Сэтгэлийн эмзэглэл - Миний бодлоор бол Чулууныг туслах хоньчноор аваад өөрийн хүү шиг үзэж байвал таны сэтгэлийн сорви арилах юм биш үү. Ц.Ням-Осор. Юу гэнээ хөө.