1. Жижиг хайр чулуу бүхий газар - Дэрсэн хор нь уулын ар бэл, сайр, гуу жалга зэрэг газруудаар их ургадаг. Ж.Самбуу. Мал маллагааны арга туршлага., сайр газар (хайр чулуутай газар), сайр садарга [хоршоо] (хад чулуутай жалга, сархиаг), сайр хөндий [хоршоо] (уул нуруу, мөрөн, гол дагуух жижиг хайр чулуутай нам дор газар), сайр шанд [хоршоо] (хайр чулуу болон өнгөн хөрсний устай газар) - Сайр шандын усыг шавхаад шавхаад барахгүй, сайн хүний үрийг дараад дараад дийлэхгүй. Ч.Лодойдамба. Тунгалаг Тамир., сайр шандын усыг шавхаж аваад барахгүй, сайн хүний үрийг шоолж муулавч болохгүй [зүйр цэцэн үг] (а. Өсөж хөгжиж байгаа ямарваа нэгэн үйл хэрэг дарагдашгүй; б. Эрдэм чадвартай хүнийг дарагдуулж болохгүй гэсэн санаа);

---

2. Голын голдрил байсан газар: голын сайр (усны хөвөө, цээл дэх хайр чулуутай газар), хуурай сайр (хаврын шар усны үер, зуны аадар борооны үеэр усаар дүүрдэг хуурай газар) - Тэр буурал морь нүцгэн газраас ч өвс олж иддэг, хуурай сайраас ч ус олж уудаг жигтэйхэн бөх номхон сайн морь байв. Ц.Дамдинсүрэн. Түүвэр зохиол., сайр урсгал [хоршоо] (хуурай сайр), сайр чулуу [хоршоо] (голын хайрга), жалга сайр [хоршоо] (ус урсахаа больсон гуу, жалга).