Хэвтээ чиглэлийн гарлын холбоотой хамаатан хүмүүс: ойрын садан (гарлын холбоо ойр хүн), холын садан (гарлын холбоо хол хүн) - Холын садан ганц айлынхан нь жилдээ нэг удаа цагаан сараар ирж золгохдоо ирэх жилийн чинь хүнсний үхрийг манайх өгнө гэж хэлдэг. Б.Бааст. Алтайн хөх дөнөн., эхийн садан (цусан төрлийн холбоотой хүн), эцгийн садан (ясан төрлийн холбоотой хүн), амраг садан [хоршоо] (хань болон хамаатан хүмүүс) - Хамаг амьтан цөм л аав ээж, ах дүү, амраг саднаасаа салж, энэлэн шаналахын зовлонд орсон билээ. С.Дашдэндэв. Улаан наран., төрөл садан [хоршоо] (яс, махны барилдлагатай хүмүүс), ураг садан [хоршоо] (а. Цусан төрлийн холбоо бүхий хамаатан хүмүүс; б. Худ ургийн хоорондын холбоо сүлбээ) - Ингэж ураг саднаа огоорч, уулын хярыг шохоорхсон нэгэн хүнтэй хамт гурав хоноход олон сонин хачин юм ажсан. Ж.Дамдин. Миний монгол., хамаатан садан [хоршоо] (яс, цус, ураг төрлийн харилцаа холбоо бүхий ойрын төрөл) - Нөгөө хэсгийн аав ээж, ах дүү, хамаатан садан уурхайд ажилладаг байх жишээтэй билээ. С.Лочин. Сэтгэлийн өнгө., элгэн садан [хоршоо] (мах цусны холбоо бүхий төрөл хүмүүс, ойрын төрлийн хамаатан) - Элгэн садан дотроо эв найрамдлыг бүү алдъя, эзэрхэг дайсантай тулахад энэ биеэ бүү хайрлая. Монголын нууц товчоо., саднаас салж саруулаас төөрөх [зүйр цэцэн үг] (ганцаардах гэсэн санаа), саглагар модны салаа олон, сайн хүний садан олон [зүйр цэцэн үг] (сайн хүнтэй хүн бүхэн нөхөрлөдөг гэсэн санаа).