1. Юмыг юмаар солих, арилжаа хийх - Морь арилжих дон туссан хүн дээ. С.Эрдэнэ. Хонгорзул., арилжиж худалдах (сольж худалдах) - Эцгийн буян, эдлэл мал, есөн зуугаар байна шүү дээ хө, ес гурвыг арилжиж худалдвал, эдлэл мөнгөөр дутахгүй хө. Монгол ардын дуунууд;
2. Эд юмны байрыг солих, өөрчлөх:
нэр арилжих (нэрээ солих),
санаа арилжих [яриа] (санаа зорилго өөрчлөгдөх),
хөл арилжих [хуучирсан] (жагсаалд хөл сэлгэх);
3. Хуучин газраас нүүх, нутаг сэлгэх:
бууц арилжих (бууц элэгдэж, шинэ газар луу нүүх);
4. [шилжсэн] Золио хийх:
амиа арилжих (а. Бие биеийг хөнөөх, алах; б. Байлдан жанчилдахад хүчээ шавхан тэмцэх), *
төрөл арилжих (а. Шашны ёсонд төрлөө солих, хувиран төрөх; б. Үхэх -
Гэтэл үнэндээ эзэн хааны нууц зарлигаар түүнд төрөл арилжих хундага шагнасан байжээ. Л.Түдэв. Алтан гадас чигийг заана; в. Тэс өөр болох, огт өөр болох, эрс өөрчлөгдөх -
Одоо тэр үетэй зэрэгцүүлэн үзэхэд төрөл арилжсан юм шиг болжээ. С.Эрдэнэ. Хорьдил сарьдагийн дуулал).