1. Улс гүрэн, тодорхой хил хязгаартай улсын газар нутаг: эх орон (төрж өссөн газар) - Миний төрсөн нутаг, монголын сайхан орон. Д.Нацагдорж. Миний нутаг., бурхны орон (диваажин) -  Тэнгэрийг бурхны орон гэж та номлосон билүү? Ч.Лувсанжав. Дамдины бага хүү., тахилын орон (тахил өргөж буй газар), *бурхны оронд явах (нас барах), улс орон [хоршоо] (улс гүрэн);

---

2. Нутаг дэвсгэр: газар орны байдал (газрын зураг дээр томьёолсон, дүрслэгдэж байгаа хот тосгон, зам, замын сүлжээ, ус зүй ба ургамал зүйн элементүүд болон газрын гадаргуу дээр байгаа бусад онцлог зүйлс), газар орны нэр (нутаг усны нэр), халуун дулаан орон (дулаан уур амьсгал бүхий нутаг) - Далайн тэртээх дулаан орноос дассан нутгаа магтан дуулав. Д.Шагдарсүрэн. Хүлгийн үүрсэх дуун., барууны орон (европ зүгийн орон) - Барууны орны янз бүрийн үнэртэн гүгэл, бойжир зэргийг зэрэгцүүлэн асаажээ. Ж.Дамдин. Үймээний жил., хөдөө орон нутаг (хот суурингүй аглаг хээр газар), орон нутагт ажиллах (хот суурин газраас алс, нэг хэсэг газар нутагт ажиллах), орон нутгийн захиргаа (тухайн газар нутгийн захиргаа), орон нутгийн музей (тухайн нутаг дэвсгэрт буй түүх дурсгалын холбогдолтой зүйлийг үзмэр болгосон музей), газар орон [хоршоо] (газар нутаг) - Хот орон газар байгаа улс аливаа юманд хянуур байгаасай гэж бодохдоо л хэлж байна. М. Чимид. Алтан номын үсэг., орон нутаг [хоршоо] (засаг захиргааны хуваарийн ерөнхий нэр), орон хийд (тухайн нутагт байгуулагдсан хийд).