1. Аливаа юмс, үзэгдлийн үүсэх, хөгжих, оршин байхад нөлөөлөх хүчин зүйл: нөхцөл тоочих (хэрэг явдлыг бүтээх учир шалтгааныг тоочин хэлэх), нөхцөл байдал [хоршоо] (тухайн юм, үйлийн үүсэх, хөгжих, оршин байх үеийн төлөв), нөхцөл шалтгаан [хоршоо] (тухайн юм бүрэлдэн бий болоход нөлөөлөх хүчин зүйл) - Үлгэрлэвэл түймрийн галд хүчит салхи учирвал өрвөс хийхийн нөхцөл, өчүүхэн зуланд тэр салхи тусвал унтрахын шалтгаан. Субашид;

---

2. Боломж, тохироо: нөхцөл бүрдэх (уг ажлыг гүйцэлдүүлэх тохироо бүрдэх) - Нарны гэрэл агаар, газрын шим ус найрамдан зохицсоны хүчээр шалтгаан нөхцөл бүрдэж… Ц.Дамдинсүрэн. Түүвэр зохиол., нөхцөл бүрэлдэх (тухайн ажил үйлс бүтэмжтэй болох зүйлсээр бүрэн хангагдах), нөхцөл сайтай (ажлыг биелүүлэх бололцоо боломж сайтай), нөхцөл боломж [хоршоо] (хэрэг явдлыг хийж гүйцэтгэх тохироо), нөхцөл бололцоо [хоршоо] (ажил хэргийн болж бүтэх завшаан, тохиол);

---

3. Ахуй байдал: цаг уурын нөхцөл (цаг уурын таатай байдал), ахуй нөхцөл (амьдарч буй орчин тойрон) - Бүхий л нөхцөл бололцоо бүрэн төгс зохиогдсон. Д.Цэвэгмид. Зохиолын түүвэр., хүнд нөхцөл (аливаа зүйлийг хийж гүйцэтгэхэд бэрхшээлтэй, хэцүү нөхцөл байдал), хортой нөхцөл (ажил хэргийг гүйцэтгэхэд орчин ахуй нь эрүүл мэндэд муугаар нөлөөлөх байдал);

---

4. Үгсийг холбох, хувилгах үүрэг бүхий бүтээвэр: нэрийн нөхцөл [хэл шинжлэл] (нэр үгийг үндсэнд залгах бүтээвэр), үйлийн нөхцөл [хэл шинжлэл] (үйл үгийн үндсэнд залгах бүтээвэр).