Хуурай гэдгийн эсрэг утга, шингэн зүйлд норсон нь, үлэмж чийгтэй, усархаг, устай: нойтон алчуур (норсон алчуур), нойтон бургас (ургаж буй чийгтэй залуу бургас) - Намайг хар тоорцогтой явахыг ижий хармагц нойтон бургасаар ороолгов. О.Цэндсүрэн. Халуун салхи., нойтон газар (газрын хөрс ус, чийгтэй байгаа нь), нойтон өдөр (бороо, цас орсон өдөр), нойтон мах (нядлаад удаагүй малын шинэ мах), нялх нойтон [хоршоо] (бага балчир), хүйтэн нойтон [хоршоо] (халуун биш чийгтэй), хоосон нойтон [хоршоо] (эд хөрөнгөгүй, ядуу дорой) -  Захирагчийн албат хоосон нойтон ядуусаас... гаргуулжээ. Ц.Уламбаяр. Зовлон жаргал., нойтон амлах (муу зүйл хэлэх), нойтон халиу шиг (салахгүй шалж дагах, их нялуун), нойтон хамуу шиг (дагаад салахгүй байх, хоргоон шалах гэсэн санаа) - Нойтон хамуу шиг дагаад салдаггүй. Ч.Чимид. Хавар намар., ногоон түймэр унтрахгүй, нойтон хамуу эдгэхгүй [зүйр цэцэн үг] (хялбар дарагдахгүй хэцүү хэрэг явдал гэсэн санаа).