1. Ургамлын агаар, тэжээлийн эрхтэн, голдуу ногоон өнгөтэй, хавтгай хэлбэртэй - Ишний доод хэсгийн навч том, дээшлэх тусам жижгирдэг. Ш.Дариймаа. Монгол орны зонхилох ургамлын лавлагаа., модны навч (модны мөчирт ургасан хавтгай, зуувандуу хэлбэртэй, олон судалтай, ихэвчлэн ногоон өнгөтэй эрхтэн), навчаа гөвөх (модод навч нахиагаа унагах) - Зулзаган улиас навчаа гүвэхийг хэн ч эс үзлээ. С.Эрдэнэ. Малын хөлийн тоос., навч ногоо дэлгэрэх (ургамал, мод урган төлжих), навч зулгарах (ургамал, модны навч нахиа нь хийсэн унах), навч сэрчигнүүлэх (салхины аясаар ургамлын эд эрхтэн нь хийсэх), навчны ялтас (навчны мах болон судал бүхий ногоон өнгөтэй нимгэн хавтгай биет), навчин тамга (навчны дүрс бүхий тамга) - Навчин тамгатай хээрийгээ наймаалж битгий зараарай. ААЗ., навчин хээ (навчны зурагтай хээ), навч намаа [хоршоо] (ургамлын агаар солилцох эрхтэн болон нарийн салаа мөчир), навч нахиа [хоршоо] (ургамлын навчлан ургаж буй жижиг хэлтэс) - Шургашгүй навч нахиа идээлнэ. В.Инжаннаши. Хөх судар; навч найлзуур [хоршоо] (ургамлын агаар солилцох эрхтэн болон үзүүрийн зөөлөн хэсэг), навч цэцэг [хоршоо] (ургамлын агаар, тэжээл солилцох эрхтэн болон цэцэгт ургамлын бэлгээр үржих эрхтэн) - Наран саран эргэн тойроод, навч цэцэг найган ганхаад... Ц.Дамдинсүрэн. Түүвэр зохиол., нартай газар гэрээ барь, навчтай газар малаа бэлчээ [зүйр цэцэн үг] (тохилог газар амьдрах гэсэн санаа), навч шарлавал намаршина, наадам хэтэрвэл хэрэлдэнэ [зүйр цэцэн үг] (а. Намар цаг болоход ургамал, модод шарлан гандах; б. Найр наадам ихэдвэл үймээн гарах гэсэн санаа);
--oOo--