1. Урьж ирүүлэх: лам залах (лам урих), эмч залах (эмч дуудан авч ирэх) - Хүрээний лам залах санаатай явна. Л.Түдэв. Уулын үер;
2. Амин чухал хэрэгцээт эрхэм зүйлийг авахыг хүндэтгэсэн үг:
айргийн хөрөнгө залах (айраг исгэхээр тухайн жилийн анхны хөрөнгийг өөр айлаас авчрах),
рашаан залах (рашаан авч ирэх),
эм залах (эм авч ирэх) -
Би ханиад хүрээд ганц муу хадагтай эм залах гэж яваа юмсан. Д.Нацагдорж. Хөгшин хүний өгүүлэл;
3. Эрхэм дээд зүйлийг авчирч тахин шүтэх:
бурхан шүтээн залах (бурхан шүтээнээ дээдлэн шүтэх),
орой дээрээ залах (орой дээрээ тахих),
сор залах (а. Гай барцад, зовлон зэтгэрийг арилгах шашны зан үйл үйлдэх; б. Мориноосоо унаж явгарах; в. Ажил хэргийг өөрөөсөө зайлуулах),
хоймортоо залах (хоймортоо дээдлэх);
4. Хэрэгцээ нь барагдсан, хуучирч муудсан зүйлийг хаях, асгах, булахын цээрлэл:
цайны идээг хойш нь залах (цайны идээг хойд зүг рүү хаях).