1. Бүгдийг хамарсан, хамтатгасан байдал: ерөнхий ангилал (нэгдсэн бүдүүвч ангилал), ерөнхий боловсрол (бүрэн дунд боловсрол), ерөнхий дүн (нэгтгэн багцалсан дүн), ерөнхий байдал (мэдэгдэж буй байдал) - Энэ өдөр бид ажлаа үзүүлэх сургууль маягаар хийж, ажлынхаа ерөнхий байдал, ажиллах журмыг хүмүүстээ танилцуулъя гэж Минжий бид хоёр зөвлөлдсөн юм. Н. Надмид. Бүсгүйчүүдийн батальон., ерөнхий гарчиг (бүх гарчгийн жагсаалт), ерөнхий сургууль (суурь сургууль), ерөнхий хэл шинжлэл (түгээмэл хэл шинжлэл);

---

2. Төвлөн удирдах байгууллага, удирдах газар: ерөнхий хороо (а. Төв хороо; б. Төв удирдлага - Таныг нэгдлийн зардлаар Отгонтэнгэрийн амралтад явуулж амруулахаар нэгдлийн ерөнхий хороо шийдсэн. Л.Түдэв. Нүүдэл), ерөнхий газар (удирдах дээд газар), цагдаагийн ерөнхий газар (цагдаагийн төв байгууллага), ерөнхий зөвлөл (удирдах зөвлөл);

---

3. Тухайн байгууллага, газар дахь ижил ажил, мэргэжилтний дотроос тэргүүлэх албан тушаалтан: ерөнхий захирал (байгууллагын ажлыг нийтэд нь удирдах эрх бүхий хуулийн этгээд), ерөнхий нарийн бичгийн дарга (нарийн бичгийн дарга нарын тэргүүн), ерөнхий командлагч (бүгдийг захиран удирдагч), ерөнхий нябо (тухайн байгууллагын санхүүгийн орлого, зарлагыг нийтэд нь хамарсан ахлах мэргэжилтэн) - Миний бодож явааг мэдсэн юм шиг ерөнхий ня-бо маань их л баяртай ирж явлаа. Л.Дашням. Нялх ногоо., ерөнхий сайд (засгийн газрын тэргүүн) - Улсын бага хурлын дарга Амар, ерөнхий сайд Гэндэн, бүх цэргийн жанжин Дэмид зэрэг хүмүүсийг би анх намын сургуулийн хашаан дотор л үзсэн юмдаг. Ч. Чимэд. Магеллан хаагуур гарсан бэ?., ерөнхий шүүгч (шүүхийн эцсийн шийдвэр гаргах гол албан тушаалтан) - Уралдааны ерөнхий шүүгч, комиссын даргад рапорт өгөөд ёс журам бодсон юм байхдаа манайхыг хамгийн эхний гараанд уралдах бригадын нэгд оруулж хөдөл гэж дохио өгөв. Н. Надмид. Бүсгүйчүүдийн батальон., ерөнхий редактор (эцэслэн хянан засварлагч), ерөнхий эмч (эмнэлгийн тэргүүн эмч);

---

4. Бүдүүн тойм, багцаа, баримжаа - Ерөнхий бие нь хоёр тийшээ шувтандуу. Түмэн агтны магнай., ерөнхий байдал (тойм байдал, гол байдал) - Биеийн ерөнхий байдал гөлгөр бөөрөнхий, зоо нуруу нь суман тэгш байдалтай байна. Ж.Самбуу. Мал маллагааны арга туршлага., ерөнхий зарчим (гол зарчим), ерөнхий утга (гол утга), ерөнхий санаа (тойм санаа), ерөнхий төлөвлөгөө (барагцаалсан гол төлөвлөгөө), ерөнхий тойм (багц тойм), ерөнхийдөө биелэх (үндсэндээ биелэх), ерөнхийдөө дуусах (гол хэсэг нь дуусах), ерөнхийдөө цугларах (олонх нь цугларах), ерөнхийдөө дажгүй (дүн нуруу нь гайгүй), ерөнхийдөө зүгээр (барагцаа нь зүгээр) - Бичиг зохиол ба уран зохиол нь ерөнхийдөө хүн төрөлхтний бичиг үсгийн эрдэм нээгдсэн цагаас уламжилсан. С.Буяннэмэх. Түүвэр зохиол;

---

5. [шилжсэн] Тодорхой биш, оновчгүй: ерөнхий болох (гол зүйлээ тодорхой илэрхийлж үл чадах).