1. Юмны гадарга дээгүүр юм дэлгэн тавих, дэвсгэр болгон ашиглах: бууц дэвсэх (бууц зулуулах, бууцаар өнгөлөх) - Намжилмаа тогоо шанага барьж, үйл оёхоос гадна зуугаад үхэр, хоёр зуугаад хонь усалж, идүүлэн, хүйдэс хөрзөнг түүж цэвэрлэх, хэвтэр бууц дэвсэх, өвс бордоо тээж авчрах мэтийн ажил бүхэнд заавал оролцоно. Б. Нмяаа. Бид гурав., өвс дэвсэх (өвс зулах), хормой дэвсэх (хормойгоо газар дэлгэх), хивс дэвсэх (хивс тавих), зам дэвсэх (зам тавих), дэвсгэр дэвсэх (дэвсгэр тэнийлгэн дэлгэх), чулуу дэвсэх (чулуу өрөх), ширдэг дэвсэх (ширдэг дэлгэж тавих) - Цэргийн зарим нь тэрлэг хувцас дэвсэж унтана. Ц.Дамдинсүрэн. Гологдсон хүүхэн;

---

2. Аргадах, царайчлах гуйх: хормой дэвсэх (аргадан гуйх) - Хүүхдээ тэвэрсэн гуйлгачингууд хүн олны холхих гудамжны эхэн адагт хормой дэвсэн гар тосон сууна. Г.Дүйнхэржав. Арилшгүй мөр., хошуу дэвсэх (тал засан аргадах), хэл дэвсэж ярих (зулгуйчлан налиганах);

---

3. Ивэх - Хүн бүхэн бууж заг булгалж авчран дугуй доогуур нь дэвсэхээс өөр арга байдаггүй. Ж.Дамдин. Миний Монгол.