1. Хүн, амьтан, юмны хэлбэр маяг, дүр төлөв: гурвалжин дүрс (гурван өнцөгт, гурван талт хэлбэр), дүрсээр таних (хэлбэр төрхөөр таних), хуулбар дүрс (буулгасан хэв), дүрс бичлэг (харагдах дохионы агуулгыг хадгалах, хожим сэргээх зорилготой бичлэг), дүрс бичлэгийн камер (юм үзэгдлийг үйл хөдөлгөөнтэй нь тусгай хальсанд буулган авах видео хэрэгсэл), дүрс маяг [хоршоо] (тухайн зүйлийн ерөнхий дүр байдал, үлгэр), дүрс төлөв [хоршоо] (дүр төрх, царай), дүр дүрс [хоршоо] (хэлбэр маяг, хэлбэр байдал), учир дүрс [хоршоо] (а. Хэрэг явдлын шалтгаан; б. Ажил үйлд хандах эв дүй), хэлбэр дүрс [хоршоо] (гадаад өнгө үзэмж, овор төрх) - Тасалгаан дотуур нааш цааш явах бүсгүй хүний дүрс сиймгэр цагаан хөшигний цаанаас тодхон харагдана. С.Лочин Сэтгэлийн өнгө;

---

2. Юмны хэлбэр, дүрсийг хуулбарласан юм, дуурайлгасан зүйл - Авгай хүний ээмэг сүйх мэтэст хос загасны дүрс урласан байх нь элбэг. Х.Нямбуу. Хамгийн эрхэм ёсон., дүрс бичиг [хэл шинжлэл] (эртний зураг бичиг; эртний хятад, япон хэлний авианы бус бичиг);

---

3. [шилжсэн] Төлөв, зан байдал: дүрс төлөв сайтай (дүн нуруутай) - Эхнэр хүний байдал дүрс төв болбоос сайн. “Цог” сэтгүүл., *хүн дүрсээ алдах (хүний ёсноос гажууд зүйл хийх, сахилга журамгүй болох) - Энэ хэдэн хоногт гэрээсээ холдсон биш хүн дүрсээ алдаж гүйцжээ. Д.Намдаг. Залуу үе;

---

4. Амьтан, ургамлын аймгийн зүйл - Одоогоор 2500 дүрсийн жоом мэдэгдсэнээс ихэнх нь халуун бүсэд байдаг аж. “Хөдөлмөр” сонин.