1. Хаад, ноёд, язгууртны алба залгуулах харьяат иргэн - Албат аймаг, адал таван хошуу мал аль зэргээр авна. Монгол ардын баатарлаг тууль., ард албат ~ албат ард [хоршоо] (харьяат иргэд) - Ард албатаараа ийм зүстэй хүүхэн хаана байна вэ гэж хайлгажээ. Монгол ардын домог үлгэр., албат боол (харьяат боол) - Авгай хүүхдийн чинь аль муу албат боол больё. Монгол ардын тууль., албат зон (харьяат ард олон) - Тай хун тайжийг албат зонтой ацрагтун. Балжин хатны домог., албат иргэн (харьяат иргэн) - Би авгай хүүхэд, албат иргэн аливаа юмаа эргээд очьё. Монгол ардын тууль., албат нутаг (харьяат иргэний амьдарч буй нутаг орон) - Цал буурал өвгөн ах танд алт мөнгө, албат нутаг тасалж өгнө би. Арван гурван хүлгийн дуун.,  албат овогт хүн (а. Харц хүн; б. Хамжлага ард), унаган албат (унаган иргэн, уугуул иргэн), цагаан албат (баяд ноёдын үнэлж авсан харьяат), албат харц (харьяат ядуу ард) - Хамаг албат харцсын гагцхүү эх мэт болсон. Эндүүрэл хааны тууж., албат хошуу (харьяат иргэн, түүний харьяалагдах хошуу нутаг) - Айх аюулгүй албат малаар баян албат хошуугаар өргөн Алтай нутагтаа амар сайхнаар жаргажээ. Торгууд, захчин ардын тууль үлгэр., албат хамжлага (харьяат иргэд) - Хааны өршөөлт зарлигт харц ард, албат хамжлага бидэнд чухам ямар сайхан хишиг хүртээв? В.Инжаннаши. Хөх судар., улс албат [хоршоо] (улс орон, түүний харьяат иргэн), албат гэр (нурууны дагуу үүд хийсэн гэр, үүдний пин);

---

2. Аливаа нэгэн захиргааны эрх мэдлийн дор захирагдагсад - Зөвхөн ялгаа нь гэвэл, нэг нь тайжийн хамжлага, нөгөө нь сумын албат юм. Б.Нямаа. Чулуут нутгийн бүсгүй.