1. Гол, усыг хааж шороо чулуугаар хийсэн бооц, хашилт: далан байгуулах (хаалт, хашилт барих), далан барих (хашилт хийх), далан хийх (хашлага барих) - Тэр газар далан баривал гол бооход нь ашигтай байж болно. С.Эрдэнэ. Хонгорзул., хашлага далан (голын хажуугаар тулгаж хийсэн далан);
2. Зурваслан овоолсон шороо:
замын далан (засмал замын ул)
- Өл хоол муутайгаар шавар намаг дунд төмөр замын далан барьж... Б.Нямаа. Арандалынхан., усны далан (а. Усыг хаасан нарийн зурвас газар бооц; б. Ус голын далагнан хөлдсөн нь);
3. Тариалангийн тарьсан газрын хоорондын зай, журам газар, эгнээ, мөр:
шан далан [хоршоо] (мөрлөн хийсэн далан)
- Тэгэхэд ээж минь хагалсан газрын далан дээр утаа уугиулж гал түлэн... Д.Мягмар. Уянгын туужууд;
4. Замын мөрийн хоорондох элж хотойгоогүй үлдсэн нарийн зурвас газар:
замын далангаар явах (шороон замын гол дахь овгор дээгүүр явах)
- Би замтай газраар биш, замгүй газраар ч биш замын далангаар явж ирэв. Монгол ардын аман зохиолын дээж.