1. Хүн, амьтны хааны атгаал чөмгийн дээд хэсэгт байдаг гурвалжин хэлбэртэй өргөн хавтгай яс: дал барих (дал мөлжих), далны залаа (далны эрхийн орой дээрх булцан), далны ир (далны эрхий), далны маяа (далны ясны нарийн үзүүр хамрын хойдох яс) - Урт сумтай бүдүүн морьтой зуузай холбож, хурд хуваах миний цавьдар үрээний далны маяа хөлсөндөө угалзран бидэртэж, агаар салхи хайчлан сортолзох чихнийх нь араас өдрийн мөнгөн од шиг хөлс гялс гялсхийн бөмбөрөн унана. Б. Догмид. Дүүриймаа., далны мөгөөрс (далны хормой талд залгалдан орших мөгөөрс) - Гэсэр хартал Цотонгийн бие тээрмийн чулуунд үрэгдэж, далны мөгөөрс цайрч, цээжнээс нь зүрх нь цухуйж, сугаар нь уушги нь цухуйж байв. Гэсэр., далны мөр (далны хоёр хажуугийн зузаан ирмэг), далны омог (далны хярааны хот руу хөмийсөн хэсэг), дал тавих (дал шатааж төлөгдөх), далны тогоо (дал ясны маяаны хонхор), далны төлгө (далны мэргэ), далны хамар (далны хярын тууш сэрвэн яс), далны хормой (далны өргөн тал), далны хот (дал ясны хамрын хажуугийн нимгэн хавтгай хэсэг), далны хуудас (далны хоёр талын хялбар хуурдаг мах), далны хүзүү (далны маяа), далны хяр (далны хамраас хормой хүртэлх хянга яс), далны эрхий (далны тогооны гадна талын сэртгэр яс), далны яс (мөгөөрсгүй бүхэл дал) - Зээ нь нагацынхаа дэргэд дал барьдаггүй. Х.Нямбуу. Хамгийн эрхэм ёсон;

---

2. Хүн, амьтны биеийн дал хавийн газар: дал алгадах (нөхөрсгөөр таашаасан байдал үзүүлж дал мөрийг нь алгадах), дал хавчих (а. Даарснаас дал мөрөө дотогш нь хумих; б. Мэдэхгүй гэсэн санааг илэрхийлж дал мөрөө хавчих) - Далан дээрээс нь атгаж, далан гурав дугтраад... Халх ардын тууль., дал шороодох (барилдаад унах) - Ташаан дээгүүр нь давж, далаа шороодон… Д.Цэдэв. Улаан хамбан зодогт буюу тавын даваа., далаар нь тавих (а. Далаар нь хэвтүүлэх; б. Өрсөлдөгч бөхөө нуруугаар нь унагах; в. [шилжсэн] Бусдыг яаж чадахгүй болтол нь хуурч мэхлэх), дал мөр [хоршоо] (хүний мөрийн ар хэсэг) - Данагар данагар алхаатайяа хө, дал мөрөө давсан гэзэгтэйеэ хө. Монгол ардын дуу “Юндэн гөөгөө”., - Дал алгадаад гарахдаа, дараа бас уулзана гэлээ. “Цог” сэтгүүл;

---

3. Далны ясаар наадах нэг төрлийн тоглоом.