Уртлаг гүвгэр газар, намхан нуруу: гүвээ давах (толгод давах) - Гүвээ даваад манайхны ангиуд ороод ирлээ. Б.Явуухулан. Хар ус нуурын шагшуурга., гүвээ дов [хоршоо] (жижигхэн овон товон дов толгод) - Сүмбэр уулыг гүвээ дов байна л гэнэ. Алтай хайлах., гүвээ толгод [хоршоо] (үргэлжилсэн олон жижиг толгод) - Нутгийн хөх ногоон гүвээ толгод униар дунд замхран үзэгдэх нь уужим боловч хүний насан хязгаартай ямархан жамтай ертөнц билээ гэмээр. С. Эрдэнэ. Өвгөн шувуу., даваа гүвээ [хоршоо] (уул нурууг давж гарах хэсэг), - Хэдэн хоног явсны дараа тал цөлүүд өөрчлөгдөн хадан чулуу оройтой уулс, их бага толгод, даваа гүвээ элбэгшинэ. Д. Намдаг. Цаг төрийн үймээн., ухаа гүвээ [хоршоо] (а. Овгор товгор газар; б. Ухаа толгод ихтэй газар) - Тогтуун сайхан бэлчиж байсан хоньд Сундуйг гэртээ цайлж, тухлаад гарч ирэх хооронд ухаа гүвээ даван бараа тасарсан байжээ. Д. Цэдэв. Сэтгэлийн илч., *гүвээний цаанаас тархидах (нүднээс далд муулах).