Гал бүхий юм: галт бөмбөг (тэсэрдэг бодисоор цэнэглэсэн зэвсэг) - Тэд гэнэт галт бөмбөг дэлбэлж, харуулын хүнийг өөрсдийнхөө хэдэн хүнтэй сүйтгэж шатаажээ. С.Дашдэндэв. Улаан наран., галт зэвсэг (дарь, шатагч хольц, хийн даралтын хүчийг ашигласан зэвсэг) - Цаст уулын цагаан арслан цагаа ирэхлээр оготнонд бариулна гэв гэх шиг, төрийн төмөр нүүр, галт зэвсэг, дүрэмт хувцасаар гайхуулж залуудаа омогшин бүхнийг дийлж явсан цагдаа Гэндэн энэ мөн үү гэж Гаваа гайхав. Д. Гармаа. Бурхан багшаа худалдсан нь., галт онгоц (уурын хөдөлгүүрийн хүчээр гол мөрөн, далай тэнгист явдаг усан онгоц) - Энэ хоёрыг үхэтгэн унаснаас хойш тэрхүү галт онгоц нэгэн өртөөд хүрч, зогссон тул усны долгион намжаад, энэ хоёр ширүүн урсгалд туугдсаар эргийн орчим шахагдан ирсний учир тийнхүү энэ тохойд орж тогтноод сая амь орсон ажээ. С. Буяннэмэх. Алсыг зорьсон алтан загас., галт сум (тэсэрч гал гаргадаг сум) - Би буугаа мөрнөөсөө мултлан авч, галт сум хүхээнд нь хийж авуут дээшээ харлаа. С. Дашдооров. Энх улирал ханхлахад., галт тогоо (халуун тогоо), галт тэрэг (төмөр замаар явдаг дотоод шаталтын буюу цахилгаан хөдөлгүүрт тээврийн хэрэгсэл) - Өглөө эрт босож суудлын галт тэрэг тосохоор хөлсний унаанд суув. С. Хишигсүрэн. Хуучин гутал., галт уул (орой дээрээ өрхтэй, тэр өрхөөр нь үе үе халуун хайлмаг, улайссан хий, үнс, уулын чулуулаг оргилон гардаг уул)- Хот суурин гэж байгаагүй болохоор олон хүмүүс галт уул дэлбэрэхэд нэрвэгдээгүй биз. Б. Ширэндэв. Тэрхийн цагаан нуур., ажиллагаатай галт уул (үе үе хий, халуун хайлмаг оргилон гардаг, идэвхтэй галт уул), сөнөсөн галт уул (нэгэнт дэлбэрч, ажиллагаагүй болсон уул), галт уулын амсар (галт уулын өрх), галт уулын бөмбөг (галт уул дэлбэрэхэд гарсан бялхдас агаарт хөөрөн гарч бөөрөнхий буюу бөөрөнхийвтөр хэлбэртэй болсон чулуулаг), галт уулын өрх (бялхдас, хумхи зэрэг зүйл гарахад тогтсон ам), галт уулын судлал (дэлхийд оршигч галт уулын байршил, үүсэл, хөгжлийн зүй тогтлыг судлах ухаан), галт уулын хумхи (галт уул дэлбэрэхэд гарсан үнс, тоос), галт хэрэгсэл (гранат, дэлбэлэх цэнэг, мина, тийрэлтэт сум гэх мэт зүйл), галт шил (нарны гэрлийн хугарлыг нэг цэгт төвлөрүүлэн гал ноцоох буюу юмыг өсгөн томруулдаг шил) - Өглөөний есөн цаг хэдийний өнгөрч, зуны хурц нар цонхоор галт шил шиг цоноож байв. Д. Мягмар. Анхны жилийн алхаа., галт хорхой [амьтан] (шөнийн цагт гэрэлтэн харагддаг шавж авгалдай).
--oOo--