1. Малын зүс; юмны өнгөнд цайвар оролцсон: буурал морь (цайвар зүсний морь), буурал орох (үс цайж эхлэх), цал буурал (цагаан буурал, цав цагаан үстэй), улаан буурал (улаан өнгөнд цайвар оролцсон нь) - Улаан буурлаа унасан урт зандан сумаа гартаа барьсан... Жангар;

---

2. [шилжсэн] Настан, дээдэс - Насан өөд болсон буянт буурлаа би нэгэнтээ дурслаа. Д.Маам. Тэмээний дууль., буурал аав (а. Өвөг эцэг; б. Өвгөн аав, өндөр настай аав), буурал эмээ (а. Эмэг эх; б. Настай эмээ), азай буурал [хоршоо] (цал буурал, өндөр настай) - Азай буурал аавтай билээ. ААЗ., настан буурал [хоршоо] (өтгөс, өндөр настай хүн), буурал аавын буян, бухын голын шандас [зүйрцэцэн үг] (эдэлгээ даадаг унаа хөлш, эд хогшил), буурал галуу [амьтан] (Монгол орныг зөвхөн нүүдлийн үедээ дайрч өнгөрдөг ургамал идэштэн, агнуурын ач холбогдолтой шувуу), буурал гандбадраа [ургамал] (нэг зүйл эмийн өвс), буурал далан товч [ургамал] (цэцэг навчийг нь хаван, шар ус, боом өвчинд гадуур хэрэглэдэг, халуун намдаадаг нэг зүйл өвс), буурал сонгино [ургамал] (хүнхээл мэт, биеийн тэнхээг сайжруулахад хэрэглэх нэг зүйл сонгино), буурал сүвээ цагаан [амьтан] (Арктикт тархсан, нялцгай биетэн, шавжаар хооллодог нүүдлийн шувуу), буурал тоншуул [амьтан] (Европ, Азид тархсан суурин шувуу), буурал улиас [ургамал] (уд улиасны язгуурын, цагаавтар өнгөтэй хальстай, үнсэн өнгөт ноолуур үстэй, өндгөлжин навч бүхий тураг мод).