1. Далайн хөлөг онгоц зогсох, буудаллахад зориулсан далай тэнгисийн эрэгт тусгайлан бэлтгэсэн зогсоол бүхий суурин - Олон улсын усан замын том боомт Владивосток хотноо хүрэв. Ж.Дамдин. Үймээний жил., далайн боомт (далайн эргийн зогсоол);

---

2. Зорчих, очих, явах замд тохиох саад тотгор - Бусдын буянаар боомт хийж болдоггүй. Ж.Дашдорж. Монгол цэцэн үгийн далай., боомт болох (саад болох), боомт тавих (саад тавих), замын боомт (замын саад), боомт ам [хоршоо] (усан зогсоол, хил гааль зэрэгт орж гарах үүд) - Цэрэг хэзээ ч шулуун орж ирэхийг болзвоос болохгүй, боомт амны завсраар залгаагаар цагдан мануулбаас зохино. Замлин Сэнчиний намтар оршив., боомт хавцал [хоршоо] (саад хавцал) - Бид боомт хавцлыг бэхлэн сахисугай. Гурван улсын үлгэр., саад боомт [хоршоо] (түвэг бэрхшээл учруулах зүйл) - Зарим нь улаан цэрэг болж ийм тийм боомт саад давжээ. Ч.Ойдов. Их жанжин Сүхбаатар танаа., хаалт боомт [хоршоо] (а. Хаших, хориглох зүйл болон бэхлэлт; б. [шилжсэн] Хүний өөрийгөө барих, удирдах чадвар);

---

3. Хил нэвтрэх замын өртөө: хилийн боомт (хилийн гарц), боомт газар (гарц газар) - Гурвуул тэмээ унаж явсан тул зогдор хөдөлгөн алхуулсаар нэлээд явж, дайсан нэвтэрч болох сэжиг бүхий нэгэн боомт газар хүрч очив. С.Дашдэндэв. Гурван хүү;

---

4. Бэхлэлт цайзын хаалга: боомт хаалга (халхавч хаалга);

---

5. Олон улсын нисэх онгоцны буудал, онгоц буудаллах зогсоол: агаарын замын боомт (онгоцны буудал).