1. Боох үйлийн үр дүн; юм боож, баглах оосор, бөс, олс, хадаг зэрэг зүйл: салны боолт (сал боох зүйл) - Баахан бургас огтолж, салны боолт суларсныг сэлбэж засаад хөдлөв. Б.Ринчен. Заан залуудай., хонгоны боолт (хонгоны тус газар зангидах бөс), хар хулын боолт (хурдан морины сүүлний боолт), шархны боолт (шарх дарж боох бөс), эмчилгээний боолт (эмчилгээний зориулалттай дарж баглах бөс), булчингийн боолт (булчин ороох бөс) - Булчингийнхаа боолтыг чангалж суугаа Батын царайд үл ялих эмээсэн шинж тодров. З.Сандагаа. Эр бор харцага., хүйлүүрийн боолт (элэг бүс) - Сандрахдаа гурав давхарласан вандан хадгаар хийсэн хүйлүүрийн боолтноос хүчтэй барив. Ж.Дамдин. Монгол бөх., боолт боолторго [хоршоо] (уяа оосор) - Түүний хүзүүний боолт боолторгод байсан хоёр үсгийг би сайн танина. Ж.Верн. Арван таван наст капитан., боолт хорио [хоршоо] (саад хорио) - Мод унагаж боолт хорио хийв. Чехийн эртний домог;

---

2. Эхнэр хүний толгойн чимэг: боолтны бөжигнүүр (доош унжсан чимэг), боолтны бэлчир (чимгийн уулзвар), боолтны суурь (доод их бие), боолтны сэнж (боолтыг юманд барих, өлгөх, уях, хэлхэх зэрэгт зориулсан зүйл), боолтны унжлага (унжсан чимэг), боолтны хорол (хигээс бүхий цагариг дугуй хэсэг), боолтны шигтгээ (боолтны үнэт чулуун чимэг), барга эхнэрийн шигтгээ (хув чимэгтэй, найман тахил угалзтай хөөмөл мөнгөн боолт), дарьганга боолт (оюу, шүр шигтгээтэй алтан шармал мөнгөн боолт), мянгад боолт (а. Шанааны хоёр хадлаганы тус доод талаас мөнгөн утас унжсан боолт; б. Булигаар дээр мөнгө, шүр хадсан боолт), саалийн боолт (хар булигаарыг ногоон сарьсаар эмжиж, шүр, тана хадаж, гуулиар бөгжилсөн боолт), сийлбэр боолт (оюу, хув, шүрэн шигтгээтэй сийлбэртэй мөнгөн боолт), үзэмчин боолт (улаан бөс дээр шүр хүрээлж хадаад голд нь мөнгөн чимэг хийж, доош нь ханан хээ гаргаж, номин, оюу, сувд, шүр хадаж унжуулсан боолт), хадмал боолт (мөнгө, сувд, шүрэн халага хадсан даавуун боолт), халх боолт (хар булигаарыг ногоон сарьсаар эмжиж, тана, шүр хадаж, гуулиар чимэглэсэн, гэртээ зүүдэг, гоёлын бус боолт), хорол боолт (хорол чимэгтэй алтан шармал боолт), цувимал боолт (мөнгө шавандаж хээлсэн боолт) - Бага хатны нь толгойн боолт алт мөнгөн чимэг зүүлтийг авч авдар дээр тавилаа. Ц.Уламбаяр. Зовлон жаргал., боолт зүүсгэл [хоршоо] (үсний чимэг зүүлт) - Инжаан дархнуудаар боолт зүүсгэл, ээмэг бөгж цохиулж өгчээ. С.Удвал. Их хувь заяа.