1. Хувь хүний эзэмшсэн тогтолцоот мэдлэг, чадвар; мэргэжил мэдлэг эзэмшсэн нь: боловсрол нимгэн (эзэмшсэн эрдэм мэдлэг муутай), боловсрол сайтай (а. Дээд мэргэжлийн сургуульд боловсрол эзэмшсэн; б. Мэдлэгтэй), боловсролын социологи (боловсролын тогтолцоо, үйл явц, нөлөө, үр ашгийг судалдаг нийгмийн ухааны салбар), боловсролын үнэмлэх (ямар нэг шатны мэдлэг эзэмшсэн үнэмлэх), боловсролын хууль (тогтолцоотой мэдлэг эзэмшүүлэх тухай хууль), ардын боловсрол (нийтийн мэдлэг мэргэжил эзэмших явдал), бичгийн боловсрол (бичиж найруулах чадвар, эрдэм), дээд боловсрол (их сургууль, коллежийн боловсрол), ерөнхий боловсрол (байгаль нийгмийн үзэгдэл хийгээд мэргэжил эзэмшихэд чухал хэрэгцээ бүхий шинжлэх ухааны ерөнхий үндсийг заан сургах хэмжээ), нийгмийн боловсрол (нийгмийн харилцаанд оролцох, нийгмийг танин мэдсэн мэдлэг), тусгай боловсрол (хөгжлийн бэрхшээлтэй иргэдэд олгох боловсрол), улс төрийн боловсрол (улс төрийн мэдлэг мэргэжил), боловсрол хүмүүжил [хоршоо] (мэдлэг болон боловсон ёс зүй) - Одоо миний өмнө суугаа боловсролтой хүмүүжилтэй гуч эргэм насны наргиантай энэ залуу... Д.Маам. Тэмээний дууль., мэдлэг боловсрол [хоршоо] (сурч мэдсэн зүйлийн хэр хэмжээ), соёл боловсрол [хоршоо] (шинжлэх ухаан, урлаг, боловсрол хүмүүжлийн цогц);

---

2. Зохих хэмжээний мэдлэг эзэмшсэн: урлагийн боловсролтой хүн (урлагийн талаар мэдлэгтэй, урлаг ойлгодог хүн), хэлний боловсрол (а. Бичиж найруулах эрдэмд суралцсан байдал; б. Гадаад хэл эзэмшсэн байдал);

---

3. Аливаа үйлийн үр дүн, дагавар - Тиймийн тул сэтгэшгүй муу ач үрийн боловсролыг эдлэх. Тийм муу үйлийг би үл үйлдмүй. Зуун билиг.