1. Ойр, дөт, дэргэд: шадар айл (ойр дөт буусан айл) - Тэгээд ойр хавийнхаа шадар айлуудын гэрийг хүртэл гаднаас нь чагнадаг байлаа. Ж.Пүрэв. Гурван зангилаа., шадар байх (ойр байх), шадар орших (ойр орших), ойр шадар [хоршоо] (хамгийн дотно, нөхөрсөг) - Радио бол малчин ардын хамгийн ойр шадар туслагч билээ. Б.Бааст. Алтайн хөх дөнөн., - Танд Сэрээнэн гэгч ойр шадар бараа болно. Ц.Уламбаяр. Зовлон жаргал;

---

2. Дотно, итгэлтэй: шадар нөхөр (дотно, итгэлтэй нөхөр), шадар сайд (а. [хуучирсан] Төрийн тэргүүнд бараа болох сайд - Богдын шадар сайдууд хүртэл хорь гаруй лам ноёдтой уулзаж байв. Д.Гонгор нар. Сүхбаатарын тухай дурдатгалууд; б. Ерөнхий сайдын туслах, ерөнхий сайдыг эзгүй үед асуудлыг шийдвэрлэх, ажлыг орлон хийх эрх бүхий албан тушаалтан - Ерөнхий сайд гадаадад айлчлалаар яваа тул энэ асуудлыг шадар сайд, шийдэж өгнө гэж нарийн бичиг нь хэлсэн байна. “Сэрүүлэг” сонин., шадар дотно (дотно, итгэлтэй), шадар хүн (дотно, итгэлтэй хүн) - Хатанбаатарын нутгийн шадар хүн биз дээ гэж агтны цэрэг ирж асуув. С.Удвал. Их хувь заяа., шадар хэрэг [хуучирсан] (ойр зуурын хэрэг) - Догшин Хутагтын тавдугаар дүрийн ламын шадар хэргийг захирагч бөлгөө. Агваандандар судлалын чуулган I., шадар цэрэг (дотно, итгэлт цэрэг) - Чи миний шадар торгон цэрэг байх болно. Ж.Пүрэв. Гурван зангилаа., шадар эм [хуучирсан] (бусад эр лүгээ нөхөцдөг эхнэр).