1. Хир тоос, бузар буртаггүй ариун - Урсгал нуурын ус цэвэр. В.Шарма. Таван сургамж., цэвэр агаар (утаа тоос зэрэг бохирдолгүй агаар), цэвэр аяга (угааж цэвэрлэсэн аяга), цэвэр ус (а. Урсгал буюу бохир бус ус; б. Ариутгаж боловсруулсан ус - Цэвэр ус тогтмол хэрэглэснээр, ходоод гэдэс, хоол боловсруулах эрхтний элдэв өвчнөөс урьдчилан сэргийлэх сайн талтай. “Өдрийн сонин” сонин), цэвэр хувцас (хир тоос болоогүй хувцас), хувийн ариун цэвэр (хувь хүний цэвэрч цэмцгэр байдал), ариун цэвэр [хоршоо] (хувь хүн болон олон нийтийн цэвэр цэмцгэр байдал), цэвэр ариун [хоршоо] (а. Хир буртаггүй; б. Үнэнч, чигч), цэвэр тунгалаг [хоршоо] (ариун тунгалаг), цэвэр цэмцгэр [хоршоо] (хир буртаггүй, цэвэрхэн), цэвэр цээр [хоршоо] (цэмцгэр, цээрч);
2. Аливаа юмны хийц, хийсэн бүтсэн байдал, янз, үзэмжтэй сайхан:
цэвэр оёх (өө сэв гаргалгүй сайхан оёх),
цэвэр хийх (юмыг сайн, үзэмжтэй, аятай сайхан үйлдэх);
3. Хүн, юмны гоо үзэмж бүрдсэн нь: цэвэр бичих (а. Баллахгүй бичих; б. Гоё сайхан бичих),
цэвэр царай (сайхан, үзэсгэлэнтэй царай зүс);
4. Үнэнч, шударга:
цэвэр явдал (а. Ариун, шударга, үнэнч ажил үйлс; б. Морины хатир, жороо, алхаа, сайврын алинд ч хөл алддаггүй явдал),
цэвэр ичимтгий ааш (сахилга журам сайн, явдал үйлс шударга, эелдэг даруу зан) -
Санан санан учрах, цэвэр ичимтгий аашинд, сайхан бүсгүйн сэтгэлийг эзэгнэнхэн төрлөө би. Б.Явуухулан. Би хаана төрөө вэ;
5. Дан, хольцгүй:
цэвэр ашиг (арилжаа наймааны бүх зардал зарлагыг нөхөөд үлдсэн хувь),
цэвэр мах (ясгүй мах),
цэвэр ноос (хиймэл бус, жинхэнэ, цулгуй ноос),
цэвэр ой (дан, ганц зүйлийн модоор бүрэлдсэн ой),
цэвэр өнгө (холимоггүй дан ганц өнгө),
малын цэвэр өсөлт (жилийн эцэст байгаа нийт малын тооноос мөн жилийн эхэнд байсан малын тоог хасаад үлдсэн хувь).