1. Хэрэглэх үйлийн нэр, хэрэглэх, ашиглах явдал - Хоёр хүний хорин хоногийн хэрэглэл хонь дөрөв, ачлага тэмээ хорийг хэрэглэж дорд ардыг хэтэрхий зовоох тул гомдоно. Ц.Насанбалжир. Ардын заргын бичиг;

---

2. Хүмүүсийн ажил, амьдралд хэрэглэх аливаа зүйл: зэвсэг хэрэглэл (зэвсэг болгон хэрэглэх зүйл болон бусад шаардлагатай зүйл) - Бүрэн зэвсэг хэрэглэлээ, бүүргэнээсээ өлгөөд ороорой, хортой бүү үг хэлээрэй, хошуу хотлыг бүү дайраарай гэжээ. Халх ардын тууль., хувцас хэрэглэл (хувцас хунар, бусад зүйл) - Эхний үед цэргийн байдлыг эрс өөд татна, зэвсэг оросоос авна, хувцас хэрэглэлийг хүртэл солино гээд л сүйд болов. Л.Түдэв Алтан гадас чигийг заана., хуурай хэрэглэл (болгож боловсруулаагүй идэш уушны зүйл), хүнс хэрэглэл (идэш уушны зүйл) - Унаа хөсөг, хүнс хэрэглэл танай цэрэгт орж байгаа хүмүүс өөрсдөө аваад мордох биз дээ гэв. Ж.Пүрэв. Гурван зангилаа., цалин хэрэглэл (ажлын хөлс болон бусад зүйл) - Цалин хэрэглэлийг заримдаа гурван сар болтол өгөхгүй хойшлуулах нь аль олон байдаг байна. Ц.Дамдинсүрэн. Түүвэр зохиол., эд хэрэглэл (бараа таваар) - Пүүсээс ноёдын авсан аваагүй өдий төдий эд хэрэглэл торго дурдмыг бичих зэргээр дааж давшгүй юм болгосон нь илэрхий ажээ. С.Удвал. Их хувь заяа., эм хэрэглэл (эм тан болон эмнэлгийн бусад тоног төхөөрөмж) - Зөвхөн эм хэрэглэлээ сэлбэх, аймаг руу мэдээ өгөх хэргээр хааяа нэг сумын төв орохдоо... П.Лувсанцэрэн. Хөдөөгийн дуун;

---

3. Тухайн ямар нэгэн юманд харьяа, хамаа бүхий зүйл, бүрэлдэхүүн хэсэг: бичгийн хэрэглэл (юм бичихэд ашиглах дэвтэр, үзэг харандаа гэх мэт зүйлс), гэрийн хэрэглэл (гэр ахуйн тавилга) - Өглөө нь Эрдэнэ түргэн явж, хороон дарга Даржаа баатартай уулзахаар явахдаа гэрийн хэрэглэл авах хэдэн мөнгөн янчаан өгчээ. Ч.Лодойдамба. Тунгалаг Тамир., цагаан хэрэглэл (ор дэр, хөнжлийн гадуурх даавуу) - Бадрахын нүдэнд эмнэлгийн цэвэрхэн өрөө, ор дэрний дун цагаан хэрэглэл, ялдамхнаар инээмсэглэн зогсох сувилагч бүсгүй цөм ер бусын ариун сайхан харагдав. Л.Дашням. Бурхантын цэцэг., толгойн хэрэглэл (толгойн гоёл) - Юуны тэргүүнд бэрдээ хоёр алтан бөгж, ээмэг, толгойн хэрэглэл цохиулах, хурамдаа өмсөх дээлийн нь өнгийг авах гэж бодож явлаа. Ч.Лодойдамба. Тунгалаг Тамир., эмээлийн хэрэглэл (эмээлийн гоёл чимэглэл).