Хүмүүсийн санаа бодол хоорондоо тохиролцохгүйгээс болж, маргах, тэмцэлдэх нь: хэрүүл гарах (харилцан санал зөрсний улмаас маргаан үүсэх) - Эндээс эхлэн зарим дарга нарын дотор зөрөөн гарч олзолсон юмаа булаалдан хэрүүл гарч байлаа. С.Удвал. Их хувь заяа., хэрүүл гуйх (зориудаар маргаан өдөөх) - Хэрүүл гуйж байгаад тэр залуугийн шарыг хөдөлгөөд авч гэнэ. Д.Мягмар. Нийлэх замын уулзварт., хэрүүл өдөөх (хэрүүл, маргаан гаргах) - Ухаант хүмүүс эвийг хичээх, мулгуу агсмууд хэрүүл өдөөх гэсэн үг байдаг болохоор чи өөрийгөө хэн болохоо мэдэж байна уу?; В.Шарма. Таван сургамж., хэрүүл хийх (хүмүүстэй санал зөрж, ам мурийх), *хэрүүлийн тулам (хэрүүл хийх дуртай хүн), хэрүүл үүсэх (маргаан болох) - Дангааг ирэхийн өмнө гэрийнхний хэрүүл үүссэн байлаа. Ц.Уламбаяр. Зовлон жаргал., хэрүүл чагнах (маргааныг нууцаар сонсох) - Хэрүүл чагнаад яах вэ гэж бодоод би гараад явсан. С.Лочин нар. Галтай залуу нас., *хэрүүлээр амьсгалах ~ хэрүүлээр хоол хийх (а. Үргэлж хэрэлдэж маргаж байдаг; б. Хэрүүлтэй орчинд байнга байх, амьдрах), хэрүүл баруул [хоршоо] (олон хүний маргалдах шуугиан, дуу: хэрүүл шуугиан), хэрүүл доруул [хоршоо] (хэл ам, маргаан тэмцэл), хэрүүл маргаан [хоршоо] (хэрэлдэн маргах нь) - Түүнээс болж харь хадмын хооронд хэрүүл маргаан дэгдэж үүр цайтал пижигнэжээ. В.Шарма. Таван сургамж., хэрүүл тэмцэл [хоршоо] (маргаан, үймээн шуугиан) - Зээлүүлсэн мөнгөний эзэд манай тус тусын гэрт ирж хэрүүл тэмцэл болсон хийгээд... Ц.Насанбалжир. Ардын заргын бичиг., хэрүүл цуугиан [хоршоо] (хэрүүл маргаан), хэрүүл шуугиан [хоршоо] (хүмүүс хоорондоо ямар нэгэн зүйлээс болж үл тохиролцон маргалдах нь) - Гэрийн дотор ингэж ам булаацалдсан хэрүүл шуугиан дэгдэж Чимид авгай уур нь бадарчээ. П.Хорлоо. Багш., хэрүүл хийснээс хэлэлцсэн нь дээр, хий таамагласнаас үзсэн нь дээр [зүйр цэцэн үг] (аливаа зүйлийг өөр хоорондоо зөвшилдөн шийдвэл илүү сайн гэсэн санаа).