Энгийн, ерийн, угийн - Энэ хорвоод өөрчлөгдөж хувирсан зүйл огтхон үгүй бүх юм хэвийн хуучнаар, амьдрал жам ёсоороо урагш явж байлаа. С.Лочин. Сэтгэлийн өнгө., хэвийн амьдрал (жирийн амьдрал) - Хүрээний хэвийн тайван амьдрал ийнхүү эхэлжээ. Ж.Дамдин. Үймээний жил., хэвийн ажиллагаа (ердийн, энгийн ажиллах явц) - Малын биед магни дутагдвал булчингийн хэвийн ажиллагаа өөрчлөгдөж, өвчин эмгэгт амархан нэрвэгдэх зэрэг шинж тэмдгүүд үзэгдэнэ. Ж.Самбуу. Мал маллагааны арга туршлага., хэвийн байдал (байвал зохих ерийн байдал, хэмжээ) - Өнөөх юман дээрээ эргэн ирж, бүгдийг нь гаргаж аваад нүх зоорио хэвийн байдлаар нь засаж орхиод буцжээ. В.Шарма. Таван сургамж., хэвийн дулаан (цельсийн арван таван хэмээс хорин таван хэм хүртэлх дулаан), хэвийн дулаант амьтан (ерийн байдалд биеийн дулаан нь хувирдаггүй, туйлын бага хувирдаг шувууны болон хөхтний төрөл: бүлээн цуст амьтан), хэвийн мэнд сайн байх (хуучин янзаараа байх) - Энд өчүүхэн би Өршөөлт мэргэн нөхрийн хол дахь гүн хамгаалалд шүтэж хэвийн мэнд сайн сууж авай. Г.Пүрэв нар. Д.Сүхбаатарын үйл амьдралтай холбогдох баримтат материалын эмхэтгэл., хэвийн харилцаа (зөрчилгүй, ердийн харилцаа), хэвийн хэрэг (ердийн хэрэг), хэвийн явдал (жирийн явдал), хэвээр (хуучнаараа, урьдын ёсоор) - Даланбаяр ажилдаа сайн хэвээрээ эцэж цуцахыг мэдэхгүй хэд хэдэн хүний ажил хийчхээд ядарч зүдэрсэн янзгүй гарч ирнэ. С.Лочин. Сэтгэлийн өнгө., хэв хэмжээ (а. Юмны чанарыг батлахын тулд тогтоосон их бага, хүнд хөнгөний хэмжээ, нарийлаг эсэх зэрэг яс чанарын баримжаа; б. Аливаа тогтоосон шаардлага ба нөхцөл), амьдрал хэвийн үргэлжлэх (амьдрал хуучнаараа тайван байх) - Амьдрал нь хэвийн үргэлжилсээр байхад ч сэтгэл нь гэгэлзэн уйтгарлан, сууж байж чадахыг больжээ. С.Лочин. Сэтгэлийн өнгө.
--oOo--