1. Өөрийн, төрсөн эрэгтэй хүүхэд: нуган хүү - Хүү минь чиний эцэг бол Эрийн сайн Хан харангуй гэж сайн баатар байсан юм. Халх ардын тууль., хүү төрүүлэх (эрэгтэй хүүхэд гаргах) - Би насныхаа залууд хоёр хүү төрүүлсэн билээ. Ц.Уламбаяр. Зовлон жаргал., хүүгээ хөхүүлэх (өөрийн хүүдээ хөхөө хөхүүлэх) - Хүүгээ хөхүүлэхээс урьдаар дотоод энгэр рүүгээ жаахан саачхаж байгаарай. Ж.Пүрэв. Гурван зангилаа., хүү хүүхэн хоёртой болох (эрэгтэй эмэгтэй хоёр хүүхэдтэй болох), хүү бэр (хүүгийн гэргий), их хүү (том хүү) - Бас энэ жил, их хүү нь барилгын зургийн дээд сургууль төгсөж инженер болжээ. С.Удвал. Та бид уулзана., дунд хүү (том, бага хүүхдийн дундах хүүхэд), бага хүү (отгон хүү) - Гарьдын дунд хүү бүр танигдахгүй том болоо шив гэж Сувд авгай бодож суув. З.Баттулга. Уяхан замбуутив., ач хүү (өөрийн хүүгийн эрэгтэй хүүхэд) - Өвгөний ач хүү энэ удаа тэнд алга байв. Ц.Уламбаяр. Зовлон жаргал., өргөмөл хүү (айлаас өргөн авсан эрэгтэй хүүхэд) - Болдын өргөмөл хүү Магсар үргэлж боов чихэр идэх боловч, Цэрэнд үл өгнө. Ц.Дамдинсүрэн. Гологдсон хүүхэн., хүргэн хүү (охины нөхөр) - Тэгээд Лувсан, хүргэн хүү аль нь ч хэдэн мал эргүүлж өгөөд байна. Ц.Дамдинсүрэн. Түүвэр зохиол., эцэг хүү хоёр (аав хүү хоёр) - Тэр ерөөл бат орших болтугай гэж хүүгээ мордуулж үдлээ, эцэг хүү хоёрын нарийн яриаг тэр бүр хэн мэдсэнгүй. С.Удвал. Их хувь заяа., хүү минь хүү минь гэхээр хүний толгой дээр гарах [зүйр цэцэн үг] (хүний хайр даахгүй байх гэсэн санаа), хүү олдоно, дүү олдохгүй [зүйр цэцэн үг] (хүүг төрүүлж болно, дүүг төрүүлдэггүй учир дүү эрхэм гэсэн санаа), хүүгээ хөхүүлж байхдаа сургахгүй бол хүрз барьсан хойно нь сургаж чадахгүй [зүйр цэцэн үг] (хүүхдийг багаас нь хүмүүжүүлэх хэрэгтэй гэсэн санаа);

---

2. Бага залуу эрэгтэй хүн - Нутгийн хүмүүс ч түүнийг төлөв томоотой, сэргэлэн цовоо ном эрдэм сайтай хүү гэж хүндэтгэнэ. Ц.Уламбаяр. Зовлон жаргал., адуучин хүү (адуу малладаг залуу) - Нөгөө нэрэлхүү ёргио адуучин хүү хэзээ язааны нэр цуутай бөх шиг дээлтэйгээ салбаганан дэлж ирээд... Б.Сосорбарам. Очсын хүрээлэн., жаал хүү (бага насны эрэгтэй хүүхэд) - Тэр хашаанд байгаа жижиг гэрт сумын бага сургуульд байсан жаал хүү, эмгэн хоёроос өөр сэжиглэхээр хүн байхгүй ажээ. Ц.Уламбаяр. Зовлон жаргал., хар хүү (гэзэг тавьсан залуу) - Тэмээн ачааг хөтөлсөн цагаан нэхий дээлтэй залуу хар хүүтэй уулзаж мэндлэв. Ц.Дамдинсүрэн. Түүвэр зохиол., хүний хүү (бусдын хүү) - Нээрээ л ялгаа байхгүй хэн нэгэн хүний хүү хийх л ёстой ажил юм чинь. Л.Дашням. Бурхантын цэцэг;

---

3. Янаг, хайртай хүн: амраг хүү (дурлалт хүн) - Алтан үгт захиаг амраг хүү чинь аваад асар их баярлав. П.Хорлоо. Түүвэр зохиол;

---

4. [хуучирсан] Энгийн цэрэг, хуяг.