Охинтой нь ханилсан нөхөр - Хүргэн гэдэг чинь төрсөн хүүтэй адил, бэр гэдэг чинь төрсөн охинтой адил байх ёстой. Б.Нямаа. Арандалынхан., хүргэн авах (охиноо мордуулахгүйгээр хүргэнээ гэртээ авчрах), хүргэн ах (эгчтэй нь ханилсан эрэгтэй) - Бадмаагийн хүргэн ах, ажилтай ажилгүй нь мэдэгдэхгүй боловч харсаар байтал их гарын эр. С.Эрдэнэ. Өгүүллэгүүд., хүргэн дүү (охин дүүгийн нөхөр), хүргэн болох (айлын охины нөхөр болох) - Баян айлд хүргэн болчхоод ижил морь унаад айл хэсэж явдаг ч юм бил үү. С.Удвал. Их хувь заяа., хүргэн орох (эмэгтэйн гэрт очиж, хуримлан суух: монголын эртний заншлаар бол гуйх хүүхнийд нь хүүгээ аваачиж өгдөг байжээ) - Түүний эцэг хаван гүйсэн юм шиг бэлцгэр том хуруунуудаараа ширээний буланг тогшиж хэсэг дуугүй сууснаа: -Та манайд хүргэн орох гэж байгаа юм уу? гэж гэнэтхэн асуув. С.Эрдэнэ. Хонгорзул., хүргэн хүү (а. Охинтой нь суусан эр - Хүргэн хүү гэдэг хатсан хүзүүний мах идэж, хадмын хатуу ажилд зүтгэж явах ёстой сон. Ц.Ням-Осор. Юу гэнээ хө; б. Хуримлаж байгаа хүү), хүргэн үзэгдэх (хуримын урьд орой хүргэн хөөрөг зөрүүлж, тамхилахаар хадам эцгийнд зочлох хуримын нэгэн зан үйл), хүргэн хувцаслах (хүргэнд аягатай сүү барьж, хүрэм, цамц бүсэнд хавчуулж эсвэл бүс бүслүүлж өөрийн болголоо гэсэн санааг агуулсан хуримын зан үйл), хүргэн хүү тусаа үзүүлэх, хүрэн үхэр хүчээ харуулах [зүйр цэцэн үг] (хүн амьтны тус хүч, хөдөлмөрийг зохистой ашиглах гэсэн санаа), хүргэний гэрт хүнийх шиг, хүүгийн гэрт өөрийнх шиг [зүйр цэцэн үг] (хүний ааш занд тааруулан харьцаж байх гэсэн санаа).
--oOo--