Хүндлэл бүхий, эрхэмлэн хүндэтгэвэл зохих хүн, нэр хүнд бүхий: хүндэт алдар хүртэх (нэр цуутай болох) - Гэтэл одоо багш гэдэг хүндэт алдар хүртчихээд хот газраас ирсэн зочин хониор дайлуулаад сууж байх. Д.Гарамжав. Нэгэн өглөө., хүндэт багш (эрхэмлэн хүндэтгэдэг багш) - Царай зүс өөр ч, санаа чиглэсэн зорилго ижил хүндэт багш нь түүнийг марталгүй дурсан санаж байсан юм. С.Лочин. Сэтгэлийн өнгө., хүндэт гишүүн (эрхэм гишүүн), хүндэт доктор (гаднын эрдэмтдэд олгодог, шинжлэх ухааны дээд зэрэг) - Чингэж олон орны шинжлэх ухааны академийн хүндэт доктороор сонгогдсон өвгөн буурал эрдэмтэн бол… “Утга зохиол урлаг” сонин., хүндэт зочин (хамгийн дээд хүндэтгэлийг хүлээвээс зохих зочин) - Бид малчин ардын эсгий гэрт орж, хүндэт зочны ёсоор ууц таллаж, хонины гэдсээр дайлуулсан юм. М.Чойжил. Андын нутаг алсдахгүй., хүндэт нөхөр (эрхэм нөхөр) - Одоо монгол трансын шинэ дарга хүндэт нөхөр Дорж илтгэнэ гэв. Н.Банзрагч. Зам., хүндэт самбар (ажил хөдөлмөрөөрөө бусдыгаа манлайлсан хүмүүсийн алдар нэр, зургийг хадсан самбар), хүндэт тэргүүлэгч (ямар нэгэн хурал чуулганыг удирдах хүн), хүндэт удирдагч (манлай эрхэм удирдагч) - Энэ ямар учиртай юм гэж, хажуу дахь хүнээс асуувал, энэ нь одоогийн хувьсгалт нам засгийн манлай хүндэт удирдагч эрх баригчдын зураг гэв. С.Буяннэмэх. Түүвэр зохиол., хүндэт харуул (а. Ямар нэгэн их ёслол буюу гадаад улсын тэргүүн зэргийг угтаж үдэх ёслолд хүндэтгэл илэрхийлэх ёслолын анги - Чанга чанга алхлан ирэх хүндэт харуулын халаа солилцохыг харж, Кремлийн цагтай цагаа тааруулахад бахтай сайхан байдаг. М.Чойжил. Андын нутаг алсдахгүй; б. Хүндэт хүний хөрөг, шарил бунхад болон дурсгалт зүйл зэргийг сахин хамгаалах харуул), хүндэт цол (тэргүүний ажил үйлсийг бүтээгчдэд олгосон нэр алдар), хүндэт ширээ (хүндтэй хүний суух ширээ) - Тэр хуралд уригдан, хүндэт ширээнд суусан аймгийн дарга бол … Ц.Уламбаяр. Зовлон жаргал.
--oOo--