1. Биедээ дааж авах, хүнийг тосож авах, уулзах: хүлээн авагч (а. Юм хүлээн авах хүн; б. Радио долгионыг хүлээн авах аппарат хэрэгсэл - Энэ нь хуучнаасаа ялимгүй урт, бариул нь хойш урагшаа хөдөлдөг, антен нь хажуу тийшээ болдог маш гоёмсог хүлээн авагч юм. М.Чойжил. Андын нутаг алсдахгүй), хүлээн авалт (зочин гийчин, албаны хүмүүс зэргийг хүндэтгэн дайлах дайллага), хүлээн авах (а. Тосож уулзах - Би хэдэн лан мөнгө журмын нөхдийн санд өгөх гэж тавьсан, үүнийг өгөөрэй гэснийг Жав хүлээн авав. С.Удвал. Их хувь заяа; б. Бусадтай уулзалт хийх - Уулзсан. Нэгдлийн дарга намайг өрөөндөө хүлээж авсан гэж хариулав. “Цог” сэтгүүл; в. Санал хүсэлт, шүүмжлэл, ял шийтгэлийг зөвшөөрөх - Хүсэлтийг хүлээн авч манай үйл хэрэгт туслуулахаар цэргийн их хүчийг ирүүлсэн явдалд сэтгэл гүнээ хангамжтай байна. Б.Өлзийсүрэн. Замын хүзүү), хүлээн зөвшөөрөх. (а. Аливаа нэгэн улс шинээр тусгаар тогтносныг нөгөө улс түүнийг дэмжин албан ёсны буюу албан ёсны бус харилцаа тогтоох; б. Санал нийлэх, зөв хэмээн үзэх), зочид хүлээн авах (зочдыг угтан авч уулзах), захидал хүлээн авах (захидал гардан авах) - Тэр цагаас хойш хэдэн сарын дараа би захиа хүлээж авлаа. С.Удвал. Та бид уулзана., талархал хүлээх (хүмүүсийн сэтгэлд нийцэх, бусдын хайр хүндэтгэлийг олох) - Иймд уншигч олны талархлыг хүлээж Ц.Гайтав БНМАУ-ын төрийн шагналыг уул зохиолоороо хүртсэн билээ. “Цог” сэтгүүл., тушаал хүлээн авах (шинэ алба хаших, шинэ тушаалд томилогдох) - Хасбаатар тэгж тушаал хүлээн авсныхаа дараа удалгүй хэдэн нөхдийн хамт баруун хязгаарыг зорин морин тэргээр довтолгон оджээ. С.Дашдэндэв. Улаан наран., хүндэтгэл хүлээх (талархал хүлээх) - Хүн гэдэг чинь нас гүйцэхдээ л сая нэг үнэд орж, хүндэтгэл хүлээдэг ухаантай юм уу даа. “Цог” сэтгүүл;

---

2. Тулгарсан ял, тогтоол болон бусдын санал шүүмжлэлийг зөвшөөрөх: алба хүлээх (алба хаших), гэм буруугаа хүлээх (дутагдлаа ойлгох), Асар сайн хүн уурлавч бурууг хүлээвээс зөөлрөх, адаг муу хүн гуйх тутам улам чангарах. Субашид., зэмлэл хүлээх (буруушаагдах) - Ганц дуугараадахсан нь нөхдийнхөө зэмлэл хүлээв. Ч.Чимид. Хавар намар., хариуцлага хүлээх (хариуцсан үүргээ биелүүлээгүйн төлөө зэм хүртэх), хэрэг хүлээх (хийсэн хэргээ зөвшөөрөх) - Хэргээ хүлээ! хэл хэл! гэж гэм хийгээгүйгээ мэдэвч, эрүү шүүлтээр цусыг нь урсгаж, түмэн хилс хэрэг хүлээж байв. Б.Ринчен. Гүнж., ял хүлээх (хийсэн хэргээ зөвшөөрөх, шийтгүүлэх) - Бас ч миний биеийг хүрээний газар баригдав, эрүү шүүлт тулгуулав, алагдах ял хүлээв гэр зэргээр үг тархсан байлаа. Ж.Дамдин. Үймээний жил.