1. Худал хэлж, хүнийг мэхэлдэг овилгогүй муу зан - Хувхай хуурамчийн зангаар, хурдан үгсийг дуулав хэмээжээ. Д.Равжаа. Зохиолын эмхэтгэл., хуурамч хүн (худал хэлдэг, овилгогүй хүн) - Банзар амиа бодсон нэг л хуурамч хүн шиг санагдахад дарга дотроо зэвүүрхсэн байдалтай байв. Ж.Бямбаа. Их аяныхан., хуурамч зан гаргаж ханиа битгий зовоо, худал хов тарааж хотлоон битгий зовоо [зүйр цэцэн үг] (хуурамч зан битгий гарга, худал үг битгий хэл гэсэн санаа), хуурай модны жин хөнгөн, хуурамч хүний зан хөнгөн [зүйр цэцэн үг] (хуурамч хүн юманд үнэн сэтгэлээсээ ханддаггүй гэсэн санаа), худалч хүний нээрэн олон, хуурамч хүний хөөрхий олон [зүйр цэцэн үг] (худалч, хуурамч хүн янз бүрээр аашлах нь их гэсэн санаа);

---

2. [шилжсэн] Жинхэнэ бодитой биш, дуураймал юм: хуурамч алт (жинхэнэ биш алт), хуурамч дүр (дуураймал байдал) - Наанаа нигүүлсэнгүй юм уу, хүлцэнгүй хүний хуурамч дүр харуулахдаа маш чадамгай болж. С.Эрдэнэ. Өгүүллэгүүд., хуурамч мөнгө (хууль бусаар үйлдвэрлэсэн мөнгөн тэмдэгт), хуурамч хэрэг (үнэн биш, хуурмаг хэрэг), хуурамч үе анагаах (хугарсан яс бороолохгүй байсаар хэвийн биш үе үүсэх согог), хуурамчаар үйлдэх (хууль бусаар дуурайлган хийх) - Зарим хүмүүстэй сэм хуйвалдаж, данс даягийг хуурамчаар үйлдэж байжээ. Н.Банзрагч. Зам., худал хуурамч [хоршоо] (үнэн биш, хуурмаг) - Түүний ярьж байгаа үг цөм худал хуурамч байх шиг санагдав. Ж.Пүрэв. Гурван зангилаа., хуурамч бамбайтан [амьтан] (нуруу нь бөмбөгөр хатуу, өехий талдаа зөөлөн биедээ гэчирсгүй байдаг тэнцүү далавчит шавжийн бамбайтны дэд багийн овгийн шавж), хуурамч гүрц [амьтан] (Амар мөрний сав газрын гол мөрөнд амьдардаг нэг зүйл загас).